U Myntri Sorkar Pdeng ba dei khmih ïa ka tnat Information and Broadcasting, u Anurag Thakur u la pynbna ba kane ka tnat kan pynthikna ïa ka jingaiei ïa ki connection Doordarshan DTH ha ki shnong kiba don ha ki jaka khappud hapdeng ka India bad ka China. U la ong ruh ba yn pynthikna ia ka jingpynkhlaiñ ia ka mobile network ha kine ki shnong bad ba ka Sorkar ka ïeng skhem ban pynthikna ïa ka jingïasoh kaba kham bha bad kine ki jaka.
U Myntri u la ong ïa kane ha ka jingïakren ba u la pynlong bad ki nongshong shnong jong ka Karzok kaba don ha Ladakh kaba jngai kumba 211 kilometre na Leh.
Lah ban shu kdew hangne ba khnang ban pynurlong ïa ka thong ban pyniasoh bad ki briew kiba sah ha ki jaka kyndong kynshrot bad ki jaka khappud lyngba ka rynsan jong ka DD “FreeDish”, ka Sorkar ka la ai jingmut ban ai ei 1.5 tylli ki connection Free Dish ha ki shnong kiba don ha ki jaka khappud.
U la ong ba ka Sorkar ka kut jingmut ban kyntiew ïa ki shnong kiba don ha ki jaka khappud bad u la kular ïa ki nongshong shnong ba ki jingdawa jong ki kiba ïadei bad ka jingïasoh kaba kham bha bad ki kam digital bad ki lad ka leit ka wan, ka jingkyntiew ïa ki kam jngohkai, ki jingdon jingem na ka bynta ki kam ïalehkai bad ka JalJeewan Mission kaba kham bha ki dei ki kam ban pyntreikam lyngba ka jingpeit bniah.
Kum shi bynta jong ka prokram jong ka Sorkar na ka bynta ki shnong kiba khlaiñ, u Myntri u la leit jngoh lai sngi ïa ka Leh-Ladakh, ha kaba u la sah ha ka shnong Karzok, u la pynlong ki jingïalang bad ki bor pynïaid UT bad distrik ban peit ïa ki skhim ba pyntreikam da ka Sorkar Pdeng bad Sorkar Jylla bad ka jingsam ïa ki tiar ïalehkai ha Karzok, u la iakren bad ki shipai ITBP ha Karzok platoon post kaba don ha ka jingjrong kaba kumba 15000 phut ha ka jaka khappud hapdeng ka India bad China.
Da ka jingthmu ban sngewthuh ia ka jingpoi jong ki projek bad ki skhim jong ka Sorkar bad ruh ban sngewthuh ia ki jingeh ba ki briew kiba sah ha ki shnong khappud hapdeng ka India bad China ki ïa kynduh, u Myntri u la pynlong ia ka jingïakren bad ki nongshong shnong bad ki ophisar.
Ia u Anurag Thakur la leit bud da ka kynhun ki ophisar bad ki nongmihkhmat. U la ïakren bad ki nongshong shnong ka Kharnak,Samad bad kiwei kiwei ki shnong bad u la sngap ïa ki jingkhuslai bad ki jingthrang jong ki. Ha Kharnak, u la plié ïa ka surok PMGSY kaba pynïasoh bad ka surok bah Dadh Kharnak.
U Myntri u la ïa kren shaphang ki kam kiba ïadei bad ka bording solar, ka um dih, ka jaka sah ïa 32 tylli ki longiing, ka surok niah cycle, ka wah ba shna da ki briew, bad ka subsidy na ka bynta ki kam jngohkai. U la iakren ruh shaphang ka jingshngaiñ jong u pud u sam, ka jingpynbha ia ki surok, ki mobile tower, ki kam kiba ïadei bad ki mradkhlaw, ka jingpyniasoh hapoh ka prokram Vibrant Village, bad ka jingsah jong ki briew kiba shang shane shatai ha kawei ka jaka.
Ha kawei ka jingïakren jong u bad ki briew na kane ka thaiñ, u Myntri u la ong ba hadien ba la seng ïa ka UT, ka la don shibun ka roi ka par ha Ladakh kum ka jingbei tyngka, ka bording baroh shi sngi, ka jingseng ïa ka jaka pynmih bording solar kaba kot sha ka T 21000 klur, ki lad ha ka kamai kajih, bad ka jing sanction ia 375tylli ki mobile tower ha Leh.
Shuh shuh, u Myntri u la ong ba baroh ki longiing ha ka thain Changthang ki la ioh ia ka um kor lyngba ka JalJeevan Mission (JJM).
U Thakur u la ïathuh ba ka don ka jingthmu ïa ki kam nangneshakhmat ki ban kyntiew ïa ka roi ka par ha ka thain Changthang bad ki jaka kiba kerpyllun ïa ka. Kine ki sienjam ki kynthup ia ka jingkyntiew ïa ki jingdon jingem na ka bynta ki lad pyniasoh bad ka jingkyntiew ïa ki kam jngohkai.U Myntri u la kular ïa ki nongshong shnong ba ka Sorkar kan pynbiang ïa ka jingkyrshan bad ki jingdonkam ban pyntreikam bha ïa kine ki jingthmu.
Ki sienjam jong ka Sorkar Modi kin ïalam sha ka jingkyntiew ïa ki kam jngohkai ha Changthang, la ong u Myntri.
Ha ka jingleit jong u sha ka Puga Residential School, u Thakur u la ïa kren bad ki khynnah bad la ïashim bynta ha ka jingïalehkai volleyball.Shuh shuh, ka District Youth Services bad ka tnat Kam Ialehkai ka la sam ïa ki tiar ïalehkai. ïa kine la sam ha ka skul kaba don ha Karzok ruh. Shuh shuh, u Myntri u la ïalehkai table tennis ha ka cell phone/mobile light.
Ha Chumur, u la ïakren bad ki shipai bad u la ïakren ruh bad ki nongshong shnong shaphang ki jingeh kiba ki ïashemkhamtam ha kaba ïadei bad ka surok, ka mobile network, JJM bad kiwei kiwei. U Executive Engineer PWD u la ïathuh ïa u Myntri ba la ai jingmut ban shna ïa ka surok kaba 7 km na ka bynta ka shnong bad ba ka DPR na ka bynta kane ka dei kaba la dep pynkhreh.
Shuh shuh, ha ka jingïakren bad ki shipai na ka 37th ITBP Post, u Thakur u la kren shaphang ki jingpynkylla ba la wanrah da ka Sorkar ban ai jingmyntoi ïa ki shipai kiba don ha ki jaka khappud kum ki jain kiba kham bha, ki tiar ïaleh, ki sienjam Make in India bad ki bai bam tymmen.
Ka jingleit sha ka shnong Changthang ka dei ka dak jong ka sienjam ban pynkupbor ia ki nongshong shnong ha ki jaka nongkyndong, ka jingkyntiew ia ka jingim jong ki bad ka jingplie lad ia ka roi ka par kaba lah ban iaineh ha ka thain. Lyngba ka jingkut jingmut bad ka jingïatrei lang, ka Sorkar ka thmu ban tei ïa ki shnong kiba khlaiñ bad kiba lah ban kyrshan ïalade ki ban don ka bynta ha ka jingïaid shaphrang jong ka ri.
Anurag Thakur PIB
