Jowai, Naitung 14:
Ka Mookyrdup, Mupliang bad ka Royalpole Mihmyntdu ki la khur ïa ka jingjop ha ka lympung ïalehkai 3rd Division Football Tournament na ka bynta ka 3rd Adelbert Laloo Memorial Trophy ba la pynïaid da ka West Jaiñtia District Sports Association.
Ha ka jingïakhun kaba la long ha ka Sngi Thohdieng ha Kiang Nangbah Stadium kaba ha Jowai, ka Mookyrdup ka la pynliem noh ïa ka Sohmynting Dongnein da 5-0 kol.
Ïa ka kol kaba nyngkong la thep da u Missile Bareh ha ka minit kaba 13. Kane ka kynhun ka la ïoh ei shi kol na ka daw ka jingbakla thep hi u rangïalehkai ka Sohmynting u Samson Lyngdoh (34).
Ka Mookyrdup ka la ïoh ban thep biang sa ar kol lyngba u Dennis Passah ha ka minit kaba 39 bad u Nidaiar Kamar ha ka minit kaba 68 na ka bynta ban khur syndon ïa ka jingjop.
Ka Mupliang ka la pynliem noh ïa ka Khliehmyntdu Neinchnong da 3-2 kol. U Byforcestar Dhar u la ïoh ban thep ar kol ha ka minit kaba 37 & 70+2 bad ïa kawei pat la thep da u Kermi Dkhar ha ka minit kaba 56. Na ka liang ka Khliehmyntdu Neinchnong ka la lah ban pynphai kylla ar kol lyngba u Fivestarson Shylla ha ka minit kaba 45 & 70+4.
Ka Royalpole Mihmyntdu ka la pynliem ïa ka Samaro da 4-1 kol. Ïa ki kol jong ka Royalpole la thep ar kol da u Pynshailang Shullet ha ka minit kaba 2 & 6 bad u Leirangki Papang ha ka minit ba 12 & Bankerlang Shylla (19). Katba ïa ka kol jong ka Samaro la thep da u Deibor Bareh ha ka minit kaba 51.
Haba phai sha kawei pat ka jingïakhun hapdeng ka Umshangiar bad ka Pateiñki Sabah ki la ïasam mar shi dor-thong (point) hadien ba kim shym lah ban thep kol haduh kaba kut ka jingïalehkai.
