Kathmandu, Naitung:
Ka Sita Dahal, ka kurim jong u Myntri Rangbahduh ka Nepal, u Pushpa Kamal Dahal ‘Prachanda’, ka la khlad noh ha ka Sngi Balang ha ka rta ba 69 snem namar ka jingbym khlaiñ ha ka met jongka.
Ka Sita, ka la shitom la slem bha, bad ka dang hap hapoh ka jingsumar bad jingkhmih jong ka Norvic International Hospital kaba don hapoh Kathmandu, ha kaba ki doktor jong katei ka hospital, ha ka por kumba 8:33 ki la pyntip ba ka Ms Sita ka la khlad noh hapdeng ka jingpyrshang jongki ban iarap bad pynim ia ka da kiba bun ki lad.
Ka Ms Sita, ka long ruh ka nongai jingmut jong ka Communist Party of Nepal (Maoist Centre) bad ka la don ia shibun jait ki jingshitom ha ka met jongka la kumba katto- katne snem.
Kitei ki jingshitom kiba ka don, ki la wanrah jingeh ia ka naduh ka bor ban iaid- ban ïeng, ban iohi, ban kren bad wat ban bam jingbam ruh.
Kumta, la pynkit ia ka sha katei ka jaka sumar ha katei hi ka step Sngi Balang hadien ba ka la ioh kem pang jur bad ban phah sumar ia ka hangtei.
Ki bor pyniaid hospital ki la iathuh ba ka Ms Sita ka la khlad noh na ka jingpang kyndeh ha ka por kumba 8 baje jong katei ka step.
U Prachanda bad ka Ms Sita ki don 3 ngut ki khun kynthei bad uwei u khun shynrang. Ka khun baheh duh jong ka iing- ka Gyanu Dahal bad u khun shynrang- u Prakash Dahal ki la khklad noh naduh ki por ba la leit.
Kumta, ki nongialam jong ki seng saiñ pyrthei bapher ka Nepal ha katei ka sngi ki la phah ia ka kyrwoh sngewlem sha ka iing u Myntri Rangbahduh jong ka ri halor ka jingkynduh jingeh jongki ha kane ka kynti.
Kumjuh ruh na ka liang u Myntri Rangbahduh ka India- u Narendra Modi u la pynpaw ka jingsngewlem halor ka jingduh noh jong u Myntri Rangbahduh ka Nepal ia la ka jong ka kurim bad kumta ruh u la pynshngaiñ bad ai mynsiem ia u ba un nang ioh pat ia ki jingkyrkhu kiba bun watla u la duh noh ia ka ha kane ka por.
