Shillong, Naitung 14:
Ka Bengaluru FC ka la thung ïa u rangïalehkai barim ka ri, u Renedy Singh kum u Assistant Coach na ka bynta ka jingïateh soskular kaba lai snem, la pynbna kane ka klob.
U Renedy, uba dangshen u la bat kum u Assistant Coach bad kum u coach ba shipor ha ka East Bengal, un ïadon bynta hapoh ka kynhun jong u Simon Grayson na ka bynta ka aïom ïalehkai 2023-24.
“Nga sngewkmen eh ban ïadon bynta bad kane ka kynhun ha kane ka jingïaid lynti kaba thymmai. Kane ka klob ka don ïa ka rukom treikam kaba biang bha ha ka ban pynïaid phutbol hapoh ri India, bad nga da thrang eh ban ïai bteng ban ïadon bynta ha ki snem ki ban wan,” la pynpaw u Singh, hadien ba u la lah ban pyndep ïa ki jingdonkam baroh na ka bynta kane ka jingïateh soskular.
U Singh, uba la long u rangïalehkai uba tbit ha ka kam ïalehkai ha ki por kiba la leit. U la ïalehkai na ki klob kum ka East Bengal FC, Mohun Bagan bad ka Shillong Lajong nalor kiwei pat ha shwa ban un shongthait noh ha u 2015.
Kum u kapten barim jong ka kynhun ïalehkai ka ri, u Singh u la ïoh ban ïalehkai 72 sien na ka bynta ka ri India hapdeng u snem 1998 bad 2011. U la ïadon bynta ruh bad ka kynhun kaba la khur ïa ka nam lahduh ha ka SAFF Championship (2005, 2011), Nehru Cup (2007, 2009) bad ka AFC Challenge Cup (2008). Utei u rangïalehkai barim na Manipur u la don bynta ruh bad ka kynhun ïalehkai ka ri ha ka AFC Asian Cup 2011.
“Ngi sngewkmen eh ban wanrah ïa u Renedy sha ka klob ka jong ngi, namar u long u rangïalehkai uba tbit bad ruh kum u coach. Ka jinglah ka jong u kan ïarap ban sei ïa ki rangïalehkai phutbol kiba kynsai na ka bynta ka Bengaluru FC, te kumta nga pdiang sngewbha bad nga kyrmen ba u lah ban pynïaid ïa ka kam kaba la pynkhamti ha u,” la ong u Director of Football jong ka BFC u Darren Caldeira.
Hapdeng u 2015 bad 2016, u Singh u la shimti kum u Assistant Coach ha ka FC Pune City ha shwa ba un leit shimti ïa ka NEROCA FC kum u Head Coach ha u 2019. Hadien ba u pynïasoh sha ka East Bengal kum u Assistant Coach ha u 2020, u la shah thung ruh kum u Coach ba shipor na ka bynta ka aïom ïalehkai 2021-22.
