Imphal, Naitung:
Kumba 500 tylli ki tynrai jong ki jait dieng bapher bapher la lah ban thung ha Vangayan, ka jaka ba la pynlong ïa ka Shirui Lily Festival ha Ukhrul distrik ha Manipur kum shi bynta jong ka 74th Van Mahotsav ha ka Lah Sngi U Blei.
Da ka jingpynïaid jong ka Ukhrul Forest Division ha ryngkat ka jingïatreilang ka shnong Shirui, ïa ka jingleh tamasa kaba shi taïew jong ka tnat ba dei khmih ïa ki khlaw la rakhe halor ka phang ‘Each One, Plant One, Stop the Chop’.
Katkum ka jingïathuh ka tyllong khubor kaba la wan na ki heh ba dei khmih, la ong ba ki tynrai dieng kum u dieng Leihao, Talhao, Pine, Cherry bad Bougainvillea la thung ha Shirui Peak, u lum uba wan balai ha ka jingjrong ha Manipur.
Ha kane ka sngi la pyllait paidbah ruh ïa ka Van Mahotsav 2023 da u MLA jong ka Ukhrul AC u Ram Muivah ha ryngkat ka jingdonlang u Deputy Commissioner jong ka Zuringla Kengoo, u heh ka District Forest, u Shaingam Shaliwo jong ka Ukhrul bad u SP jong ka thaiñ u Ringthing Hongchui, napdeng kiba bun kiwei pat.
Nalor kane ki nongshong shnong jong ka Shirui ruh ki la ïashim bynta ha ka jingïathung dieng wat lada don ka jinghap jong u slap.
