Shillong, Naitung 14:
U Novak Djokovic u la jam sha ka final ha ka sien kaba khyndai ha ka Wimbledon hadien ba une u lahduh jong u snem ba la dep u la pynliem noh ïa u Jannik Sinner na ka bynta ban khur ïa ka rekod kaba 35 ha ka Grand Slam ha ka sngi Thohdieng.
Ha kane ka jingïakhun semi final, u Djokovic u la lah ban pynliem ïa u Sinner da 6-3, 6-4, 7-6 (7/4) bad u la nang jan mynta ban kynjoh ïa ka nam lahduh kaba phra ha ka Wimbledon.
Kumta da kane ka jingjop, u Djokovic un pynkhreh ban ïaknieh ïa ka nam lahduh ha ka Sngi U Blei pyrshah ïa u rangïalehkai ba bat ïa ka kyrdan ba nyngkong ha ka pyrthei u Carlos Alcaraz, uba la lah ban pynliem noh ïa rangïalehkai na Russia u Daniil Medvedev da 6-3, 6-3, 6-3 ha kawei pat ka jingïakhun final kaba long ha ka miet jong ka sngi Thohdieng.
Lada u lah ban khur ïa ka nam jop ha ka Wimbledon, utei u rangïalehkai na Serbia un ïaryngkat mar phra sien bad u Roger Federer ha katei ka lympung kaba la long ha All England Club.
Ka jinglah u Djokovic ban kynjoh ïa u mawjam ban khur ïa ka rekod kaba 35 ha ka final jong ka Grand Slam, ka la pynlong ban tam ïa u khlur ïalehkai na America u Chris Evert.
Lyngba ka jingïoh bat ïa ka Grand Slam kaba 23, utei u khlur ïalehkai uba la bat ïa ka kyrdan ba-ar ha ka pyrthei u la khmih lynti ban ïaryngkat bad ka Margaret Court, kaba la jop 24 sien.
U Djokovic mynta ka aïom u la khur jingjop ïa ka Australian Open bad French Open, bad u khmih lynti ruh ban khur saw sien ïa ki Grand Slam ha ujuh u snem, ha kaba ka US Open kan sa sdang ha u Nailar.
Kumba ka paw u Sinner ba dang 21 snem ka rta na Italy u la jan pynliem ïa u Djokovic ha ka quarter-final jong ka Wimbledon ha u snem ba la dep ha shwa ba utei u rangïalehkai na Serbia un wanphai da ka jingjop.
Hynrei mynta u snem u Djokovic u la lah ban pynpaw ïa ka jingtbit naduh kaba sdang jong ka ‘set’ nyngkong bad haduh kaba kut u la lah ban pynurlong ban khur ïa ka jingjop.
