Islamabad, Naitung:
U Myntri Rangbahduh ka Pakistan, u Shehbaz Sharif ha ka Sngi Palei u la ong ba un sa aiti noh ia kane ka sorkar ba mynta, ha ki kti jong kita ki ban sumar bad ki ban synshar khuid naduh u Nailar hadien ba ka samoi treikam jong kane ka sorkar ba mynta kan kut noh.
U Sharif u la pynbna ruh ba ka samoi treikam jong ka sorkar jong u ka la dei ban kut noh ha ka 14 tarik jong u Nailar u ban wan.
Watla katta, u Sharif um pat shym la ai ksai ne pynpaw eiei shuh shaphang ka jingiatrei lang biang jong ki seng bapher kumba long mynta haba iadei bad ka National Assembly (NA) bad kumta ruh la ong ba ia ki jingpynbna kiba bun un sa pyntip hadien ynda ka por treikam jong u ka la jan dei ban kut noh.
Namar kumba la dep ban iasoi bad ka sorkar PTI ha ka 12 tarik u Nailar jong u snem 2018, ka samoi treikam jong ka NA kan hap ban kut noh ha une hi u Nailar u ban wan namar ka samoi ba la buh ka long 5 snem. Hynrei ia ka samoi treikam jong kane ka sorkar ba mynta, yn pyndep bad pynkut da ka sorkar iatrei lang hapoh ka jingialam jong u Shehbaz namar ka jingkhyllem noh jong ka sorkar u Imran Khan ha u snem ba la leit.
