Bertina Lyngdoh
Ka thma kumba ngi ju tip ka long ka thma ïashoh, ïadat, ïasiat, bad ïa kane la ju tip kum kata ka thma paw pyrthei lane ka thma paidbah.Nalor kane pat, kat kum ka juk stad mynta, ka thma ka lah ruh ban long kata ha ka thma ktien kaba khlem ki jingïakren ba markhmat hynrei tang da ki jingthoh bad phah ne pynphriang ïa ka kylleng kylleng. Namar ka jingstad ka pyrthei shai mynta, ngi don ruh ïa ka thma ki rynsan ki lad pathai khubor. Namar ka jingbym shlan shuh u Khla pyrshah ia ka Nairit, bad kumne la hap ban pynphriang noh da ki shithi ha ki sawlyer. Shisien ba la poi haduh une u pud kane ka mut ba ka thma pyrshah hapdeng u Khla bad ka Nairit ka la jur bha. U Khnai wat la u long u kynja mrad uba rit hakhmat u Khla, u don la ka bor ban ïakhun haduh ba u khla u ïamrem bad kut noh tang ha ka jingkhoit mynsiem.
Kumta, haba la jur than ka jingpyrshah hapdeng kine ar, namar ka jingkynrei ka pihuiñ ka bishni kam don shuh ka jingshong shngaiñ hapdeng ki bynriew. Lada kum ka bor u khla ne u sing phi don, phi ju pyrkhat ne em ba kata ka jingpyni bor jong phi ka liem noh hakhmat u trai nongbuh nongthaw. Ka jinglehsat jong phi kaba la lait noh na kaba phi thmu kane ka mut ba phim pat ler ha ki jingïakhun ba phi pyrshah. Lada kum kine ki jinglong ngi im, hato ngi ju pyrkhat mo ba ngi shong ha kane ka pyrthei shong basa.
Ki jingleh ba khlem pyrkhat ba ïano kan ktah kane ka pyni ba ngi don ïa ka mynsiem bam khñiang. Phi sngew ba phi leh ïa kaba dei eh hynrei khlem tip pat ba kane baroh ka ju wan phai kylla bad ban pynsohsat ïa ka mynsiem jong phi. Kam ju bha ban pynïanujor ne pynïadei ïalade kum u Petrus uba bad ïa u shabi ka khet bneng. Ka shithi barabor ka ju don don ïa ki artylli ki address kata jong u nongphah bad u nongpdiang, hynrei ka shithi hapdeng u Khla bad ka Nairit kam don satia kum kata. Kane ka ju jia tang hapdeng ar ki nongshun bad kane ka jingleh ka pyni ba kim don shuh ïa ka bor pyrkhat ba janai ne kata ka mynsiem ïatip lem. Kine ar ki nongshun ki wad ïa ka jingpynlehraiñ ym ka jingsuk. Phi lah ban sngew ba phi trei tam hynrei lada kane ka pynsaja pat ïa uba lanot hapdeng ka lyngngoh,balei phim kylla noh na ka jinglong sniang kyntur sha ka jing-long blei. Katta phi nang sngew heh, sngew ba lah, da kaba pynshitom ïa kiwei, khamtam ïa kiba sah ryngkat, tang katta ruh ka dohnud ka nang shong khñiang.
Na kane ka daw, to kylla kaba mut ioh ba ka jing-lehraiñ ka wan lap ïa phi. Kynmaw ba ngi im tang shisien, namar kane katno sngi phin pynshitom ïa kiba lui lui. Wat khoit ne pynshrai ïa kiwei pyrkhat ïala ka jingsuk lym bad kiba ïa sah ryngkat lang. Nalor ba ka imlang sahlang kala long lypa kaba bun ki jingduna wat ai ba kan kylla long sniew. Wat ai ba kaba sniew kan sah nam ha ka langmat jong phi, hynrei ai ba ka jingbha kan im ha ka kyrteng jong phi kan im ha ka kyrteng jong phi.
