Vilnius, Naitung:
Ki 7 tylli ki ri jong ka kynhun G7 ha ka Sngi Balang ki la kular ban dang ai jingkyrshan shuh shuh ia ka Ukraine hapdeng ka jingiakhun thma jongka pyrshah ia ka Russia nangne sha khmat da kaba phah ruh ia ki lad jingiarap bapher la ka long ha ka liang ban iarap ia ki paidbah bad kumjuh ruh naka bynta ka tnat shipai jong ka Ukraine, khnang ba kin lah ban iakhun pyrshah ia ki shipai ka Russia bad ba kin lah ban pynher krad biang ia ki shipai ka Russia kiba la rung ban thombor ia ka Ukraine hapoh u pud- u sam jongka hi.
Ha katei ka sngi, la ong ba ki nongialam jong kitei ki 7 tylli ki ri, ki la kular ba kin iatrei lang bad ban ai jingkyrshan ia ka Ukraine katba ka Russia kam pat sangeh ia ka jingleit hiar thma jongka.
La ong ruh ba kiba bun ki ri naduh kito ki ri kiba hap hapoh jong ka NATO, ki la ialeh katba lah ban ai jingkyrshan bad ban aibor ia ka Ukraine khnang ba kan lah ban iakhun pyrshah ia ka Russia bad kumjuh ruh ba kan lah ban pynbit- pynbiang ia ka jinglong- jingman hapoh ka ri wat hapdeng ka jingduh nong kaba khraw bad ka jing julor kaba jur na ka jingshah thombor dusmon ha ka Russia naduh ba sdang ka thma tad haduh kine ki sngi.
Katei ka kynhun G7 ka kynthup ia ka ri United States, ka Britain, ka France, ka Germany, ka Italy, ka Canada bad ka Japan. Ha kane ka kynti, kitei ki 7 ri ki la kular ban ai ka jingkyrshan kaba ratbah ia ka Ukraine khnang ba kan lah ban khie khlieh biang bad ban jop pyrshah ia ka Russia namar ka jingleh don bor ba palat pud jong ka Russia ha kane ka thma.
Kane kan kynthup ruh naduh ka jingphah ia ki tiar iakhun thma kum ki ‘namding ‘short range’ bad ‘long range’, ki kali thma bad kiwei kiwei de ki lad jingiarap ki ban pynkhlaiñ ia ka tnat shipai ka Ukraine khnang ba ka Ukraine kan lah ban ïeng pyrshah ban iakhun ia ka Russia da ka bor baroh kat kaba ka don.
Ha kajuh ka por, la ong ba kitei ki ri ki kular ban pynngat kyndon bad ban pynsah marwei ia ka Russia ha ki por ban wan namar ka jingleh bym suitñiew jongka Russia ia ki jingmaham jong ka pyrthei baroh kawei bad kitei ki ri kin sa ai jingsneng ia ka Russia hadien ynda kane ka thma bad jingïakynad hapdeng ka Russia bad ka Ukraine ka la kut.
Kumjuh ruh u President ka Ukraine- u Volodymyr Zelensky ha ki khyndiat por ba la leit, u la pdiang sngewbha ia ki jingkular jong ka NATO hapoh Vilnius ba katei ka kynhun kan ialeh katba lah ban thaw lad bad ban plie lad ia ka Ukraine ba kan ioh ban rung dkhot bad ban long ka dkhot ba pura jong ka NATO ha ki sngi ki ban wan.
