Imphal, Naitung:
U Myntri Rangbah jong ka Assam u Himanta Biswa Sarma ha ka sngi Palei u la pynshisha da kaba ong ba ki la don kumba 12 lak tylli ki ïing hapoh ka jingtreikam jong ka Pradhan Mantri Awas Yojana (Grameen) ba la shna ha ka jylla ha ki 7 snem ba la leit.
U la pynshisha da kaba ong ba na kine ki 12 lak tylli ki ïing ïa kiba la shna ha ka por ba synshar ka seng BJP ha ka jylla, 8.39 lak tylli ki dei kiba la dep ban shna ha ki ar snem ba la leit ha ka por ba u la bat ïa ka jingsynshar kum u Myntri Rangbah.
U Myntri Rangbah-duh u la buh ïa ka thong ban shna ïa kumba 19.10 lak tylli ki ïing haduh u snem 2024, bad na kine, 12.43 lak tylli la dep ban shna, la ong u Sarma ha ka por ba don ka ‘Griha Pravesh’ Programme na ka bynta ki 3 lak ngut ki nongïoh myntoi lyngba kane ka skhim.
“Ka sorkar jylla ka la shim ïa baroh ki sienjam ban pynwandur kumba la thmu u Myntri Rangbahduh na ka bynta ban pyntikna ha ka ban pynïoh ïing na ka bynta baroh ha u snem 2024 bad ban pyntreikam ïa ki kyndon ba ïadei bad ka PMAY (Grameen),” u la ong.
Ha ki lai bnai ba la lah, ki la don kumba 3.06 lak tylli ki ïing ïa kiba la shna hapoh ka PMAY-G ïa kiba la lah ban pyndep, u la ong. “Ngi la buh ïa ka thong ban pyndep sa kumba 6.6 lak tylli ki ïing ha u Rymphang jong u snem ban sa wan. Ynda la dep kine ki ïing, yn sa shna shuh sa kumba 1 lak tylli man u snem hapoh ka jingtreikam ka Chief Minister’s Awas Yojana,” la ong shuh shuh u Sarma.
