Washington, Naitung:
Ka tnat pule bniah jong ka US kaba dei khmih ia ki dawai- dashin, ha ka Sngi Palei ka la ai jingmynjur ia ka jing pyntreikam ia u dawai ban pynjlan khun ‘Birth Control Pill’ hapoh ka ri. Kane ka long kawei na ki khubor kaba kmen ia ki kynthei hapoh United States kiba la hap ban mad ia shibun ki kyndon aiñ haba iadei bad ka jingpynhap khun bad kumjuh ruh ha ki liang bapher.
Kumta, la ong ba utei u dawai ‘Opill’, shen un sa don noh ha man ki dukan die dawai bad ha ki iew- ki hat ym slem shuh da kumno- kumno ha une u snem ban wan.
Kumjuh ruh la ong ba katei ka jingmynjur ban pyntreikam ia utei u dawai hapoh ka ri, ka long ruh ha kane ka por ba ka United States ka dang khang pyrshah ia ka jingpynhap khun hapoh ka ri bad kane ka mat ka dang don hapdeng ka jingiatai nia bad ka jingbishar. Hynrei ia utei u dawai la mynjur bad pyntreikam pat ha kiwei ruh ki ri nalor jong ka United States.
La ong ba une u dawai ba la pynmih ha kane ka por, u long uba kham treikam bad uba kham tikna shuh shuh ban ianujor bad kiwei pat ki dawai pynhap khun lane ki dawai pynjlan khun ba la ju shem ha ki por ba la leit. Utei u dawai u long ban iada na ka jingpun khun bad kumba la ju tip ba ia utei u jait dawai la ju pyndonkam hadien khyndiat sngi tang mar iadep shongkha bad haba ym shym pat kwah ban ioh khun ne pun khun.
Bun sien ruh utei u jait dawai un kham iarap ia kito ki kynthei ki bym kwah ban pun khun na u briew uba kim don jingiadei, khamtam kito kiba shu shah batbor.
Katkum ka jingwad bniah, la shem ruh ba kumba 6.1 Million na ki longkmie ba pun khun hapoh United States man la u snem, ki dei kiba khlem da mut khnang lane ki khlem poi pyrkhat. Hynrei namar ba ki aiñ bad ki kyndon hapoh katei ka ri ki long kiba pyrkhing, ki paidbah kim don lad lait na ka ban pun bad ban kha kumba dei ka rukom.
