Moscow, Naitung:
Ka Russia ha ki khyndiat sngi ba la leit, ka la pynpaw ia kawei na ki jingthmu jong u President ka ri- u Vladimir Putin ban leit jurip sha China ha kine ki khyndiat por ki ban wan namar la ong ba kane ka long ka por kaba biang tam ia ka Russia ba kan tei ia ka jingiadei kaba skhem bad ka China naba dei tang ka China ruh kaba ïeng bad iaid ryngkat bad ka Russia naduh ba sdang ka jingleit hiar thma jongka pyrshah ia ka Ukraine ha u snem ba la leit.
U nongrah ktien ka Russia, u Dmitry Peskov haba iakren bad ki lad pathai khubor ha katei ka sngi u la ong ba u President ka Russia shen un sa pynbna noh ia ka jingleit jurip jong u sha China naka bynta ban pynskhem ia ka jingiadei hapdeng ka Russia bad China ha ki sngi ban wan.
Ka Russia ka la ialeh katba lah ban pynskhem ia ka jingiadei bad ka China la ka long ha ka liang ka ioh- ka kot, ka saiñ pyrthei bad wat ha ka liang ki tnat shipai jong baroh arliang ri ruh kumjuh da kaba pynbeit ia ki jing pynkilan bad jingiatrei lang ban pyntbit ia ki shipai jong kitei ki arliang ri wat hapdeng ka jingiakhun thma jong ka pyrshah ia ka Ukraine ha kane ka por.
