New Delhi, Naitung:
Kum shi bynta ban pynbit pynbiang ia ki lad jingiada naka bynta ka ri, ka India ka thmu ban thied ia 26 tylli ki liengsuiñ thma Rafale bad 3 tylli ki lieng ngam um Scorpene na ka France ha kine ki khyndiat por ban wan.
Ia katei ka jingtyrwa la leit rah hakhmat ka Defence Ministry da ki tnat shipai iada bad lah ruh ban pynbna ia kane hadien ka jingleit jurip jong u Myntri Rangbahduh ka ri- u Narendra Modi sha France.
Katkum ka jingpynbeit, la ong ba ka tnat shipai duriaw jong ka India kan ioh ia 22 tylli ki lieng Rafale Marine ba long ban shong tang uwei u nongñiah ha ryngkat bad 4 tylli ki lieng naka bynta kiba dang shah hikai.
Ka tnat shipai duriaw ka la ialeh katba lah ban phah pynkloi noh ia ka jing pynpoi ia kitei ki lieng bad ki submarine naka bynta ka jingshngaiñ jong ka ri lada kino- kino ki jingeh ki lah ban wan ha ka por bym lah tip, khamtam ha kum kine ki sngi ba ki thma kiba bun ki ap ha kylleng ka pyrthei.
Katei ka jingthied ia kitei ki tiar thma, ka lah ban kot palat ia ka 90,000 klur tyngka hynrei ia ka dor bad jingpynlut ba pura yn sa lah ban tip ynda la dep ban iakren bha bad ki tnat ba dei khmih.
La ong ba ka India ka lah ban shim tang ia ki tiar ki ban shna ia kitei ki lieng bad liengsuiñ, khnang ban pynbun ia ki tiar thma ba la shna hi da ka India bad ba kan ym ktah jur ruh ia ka ioh- ka kot jong ka ri ha katei ka rukom.
