Tinsukia, Naitung:
Ka jingtih beaiñ ïa ka khyndew na ka Reserve Forest hapoh ka Kakopathar Range jong ka Doomdooma Forest Division ha Tinsukia distrik kumba la kynnoh da u kontraktor jong ka PWD ka la pynbitar ïa ki nongshong shnong bad ki seng wat lada ïa ka shithi halor kane la dep ban phah sha ka jaka treikam u DFO ka Doomdooma shaphang ka jingtih beaiñ ïa u shyiap najan ki wah Na-Dihing bad Hahkati.
Kumba la ïathuh ka tyllong khubor, la ong ba ki dkhot jong ka seng Mottock Yuba Chatra Parishad bad ki nongshong shnong jong ka Dirak ki la ïohbat bad aiti ïa ar tylli ki trok kiba don ïa u Registration Number -AS 23BC 8688/ 3538 bad ka JCB AS 23CC 5945 sha ka jaka treikam kaba ha Kakopathar Range ha ka por ba kine ki kali ki dang pyrshang ban sdang tih ïa ka khyndew ha Dirak-Hahkati-Kumsang Reserve Forest.
Ki nongshong shnong ki la kynnoh ba ïa ka khyndew la thmu ban pyntreikam na ka bynta ka jingshna jong ka surok PWD ha Dirak bad ki la dawa ba la dei ban don da ka jingtohkit kaba bniah halor kane ka jingjia.
