Karachi, Naitung:
Katba ka dor jong u ata ha ka distrik Karachi jong ka Pakistan ka la nang kiew, ki paidbah jong katei ka nongbah kim banse ban thied ia utei u mar bam ha ka dor kaba rem bha watla ka la ktah shibun ia ka ioh- ka kot jongki ha kane ka por.
Ka Pakistan Bureau of Statistics (PBS) ka la iathuh ba ka dor jong u ata ha Karachi ka la kiew sha ka 3,200 tyngka 20 Kilo, kaba mut 320 tyngka shi kilo bad la ong ba ka dor jong u ata hapoh Karachi ka la palat bun shah ia ka dor ba ju die bad pyniaid ha Islamabad bad ha Punjab.
Ka Karachi ka sakhi ruh ia ka jingkiew dor kaba 200 tyngka naka bynta 20 kilo, kaba la kiew shaduh ka 3,200 tyngka. Hapoh Hyderabad pat, ia ka 20 kilo u ata la die ha ka dor 3,040 tyngka bad kane ruh ka long hadien ba la pynkiew dor biang da 140 tyngka na ka dor ba ju die baroh shi katta.
Kumjuh ruh ha Islamabad, Rawalpindi, Sialkot bad ha Khuzdar pat, ka dor jong 20 kilo u ata shi byrni, ka la kiew da T.106, T.133, T.200 bad T.300.
Shuh shuh ruh la ong ba ka dor jong shi byrni u ata ba 20 kilo ha Bahawalpur, Multan, Sukkur bad ha Quetta, ka la kiew da T.146, T.93, T.120 bad T.100.
Ha ki khyndiat por ba la leit, la ioh jingtip ruh ba ka dor jong ka shini ruh ka la kiew bha kumba 160 tyngka shi kilo ha ki iew jong katto katne ki bynta ka Pakistan.
