New York, Naitung:
Ki pulit ka New York ha ka Sng U Blei ki la pyntip ba uwei u briew u la shah dung tari ha ka jan miet Sngi Saitjaiñ ha ka jaka paidbah kaba bun briew bad heh iew bha hapoh Manhattan.
Ka tnat New York Police Department (NYPD) ka iathuh ruh ba utei u rangbah 51 snem, u la shah dung ha ka por kumba 8 baje, ka la jia ruh hapoh Time Square kaba don ha ka bynta jong ka W 40th Street & Seventh Avenue.
Ki pulit ki dang ialeh ruh ban bud dien bad thwet ia u runar uba la suba don kti ha katei ka kam bad la ong ruh ba utei u runar u la dung da ka tari ia utei u rangbah na ki bynta jong ka shadem ha katei ka jingjia.
Ia utei u rangbah la pynkit noh sha Bellevue Hospital naka bynta ki jingsumar ba bniah.
Katkum ka sngewthuh jong ki pulit, la suba ba utei u runar u dei uba shu iaid sakma bad u bym don iing- don sem.
Ha u bnai ba la lah, kumba 13 ngut ki la shah siat iap, ki la shah dung tari bad don ruh kiba iap shah tynrah kali ha ka jinglehkmen ha surok ‘Street Party’ bad kane ka la jia ha Syracuse jong ka New York ha kawei na ki step Sngi U Blei jong utei u bnai.
