Shillong, Naitung 17:
U coach ka kynhun ïalehkai ka ri u Igor Stimac, u la kyntu ïa u Myntri Rangbahduh ka ri u Narendra Modi, ban tuklar lem khnang ba ka kynhun ïalehkai ka ri kan ïoh ïa ka lad ban ïashim bynta ha ka Asian Games, watla kam shym la lah ban pynbiang kat kum ki kyndon.
Ha ka jingshisha ka All India Football Federation (AIFF) ka la thmu ban ailad ïa u Stimac ba un pynïaid ïa ka kynhun ïalehkai Under-23 ka ban long ha Hangzhou, kaba la thmu ban sdang naduh 23 tarik mu Nailur.
Kumba ka long mynta ka kynhun ïalehkai ka ri ka lah ban duh ïashim bynta ha ka Asian Games ha ka sien kaba ar na ka daw ba ka kynhun ïalehkai phutbol kam shym la lah ban pynbiang kat kum ki kyndon (criteria) kumba la buh da ka tnat ïalehkai jong ka ri, te kumta ka lah ban duh ïashim bynta ha Hangzhou. Kane ka long ka sien kaba ar ba ka kynhun ïalehkai ka ri kam shym la ïoh ban ïashim bynta ha ka Asian Games.
“Nga kwah ban wanrah ïa kane ka bynta ba ka kynhun ïalehkai U-17 ka jong ngi ban pynkhlaiñ bha naduh u 2017, khnang ba kan lah ban ïalehkai bha ha ka U-23 World Cup (qualifiers) namar ka long ka kynhun kaba biang eh, hynrei mynta ka kynti ka la duh ban ïashim bynta ha ka Asian games,” la pynpaw u Stimac hapoh social media.
Naduh u Modi, u Stimac u la kyrpad ruh ïa u Myntri ka tnat ïalehkai u Anurag Thakur.
“Kane ka kynhun ka donkam bad ka donhok ban ïashim bynta. Nga sngew ban ong ba ka kynhun ka donkam ban ïoh ïashim bynta bad nga kyntu ïa u Myntri ba dei khmih ïa ka tnat ïalehkai u Anurag Thakur ban shim khia lang khnang ba ka kynhun kan ïoh ban ïashim bynta ha ka Asian Games.”
Kumba ka long mynta ka India ka la don ha ka kyrdan ba 18 napdeng ki ri kiba hap hapoh ka Asian Football Confe-deration.
“Kumba ka tnat treikam ka kyntait ïa ka jingleit ïashim bynta ha kaba ïadei bad ka kyrdan, hynrei kumba ka long ka kunhun ïalehkai ka ri ka la don ha ka kyrdan kaba biang ban ïa kiwei pat ki kynhun kiba la ïoh ka lad ban ïashim bynta ha ka Asian games.”
Kat kum ka shithoh ba la phah da ka tnat ïalehkai sha ka Indian Olympic Association (IOA) bad shabar ki National Sports Federation (NSF) da kaba ong ba tang ki jingïalehkai kiba lah ban don hapoh ka thup kaba phra kiba lah ban ïashim bynta ha ka Asian Games.
“Phi la ju kyrshan ban pynurlong ïa ki jingangnud ka India ba shisien ka sngi ban ïoh rung sha ka FIFA World Cup bad lada phi ai jingkyrshan, ngin sa lah ban ïoh ïa ka lad ban ïashim bynta ha ka lympung bah eh tam ha ka pyrthei,” la ong u da kaba kyntu ia u Myntri Rangbahduh ka ri.
