Shillong, Naitung 17:
Ka Lawei Smith SC ka la pynkut da ka jingjop kaba ar ha ka lympung ïalehkai Women’s League 2023, hadien ba la lah ban pynliem noh ïa ka Umpling SC da 2-0 kol ha ka lah sngi U Blei.
Watla ka la jop ïa ka Mawkriah West SC haduh 6-0 kol ha ka jingïalehkai kaba la lah, hynrei ha kane ka jingïakhun kaba khatduh jong ka Group-A kaba la long ha ka lah sngi U Blei ha madan Third Ground Polo, ka Lawei ka la pyrshang ïakhun tyngeh bad kumjuh ruh ka Umpling kaba la ïashah tyngeh bad haduh kaba kut jong ka kylla step kim shym la lah ban thep kol.
Dei hadien katto katne ba la bteng ïa ka jingïakhun jong ka kylla miet ba ka Lawei ka la ïoh ban pynkhih jar nyngkong eh lyngba ka Irilang Khongsit ha ka minit kaba 52. Hadien san minit kane ka kynhun ka la pynbud biang ïa ka kol kaba ar lyngba ka Fedilia Lamare na ka bynta ban khur syndon ïa ka jingjop.
Haba phai sha kawei pat ka jingïakhun kaba la long kham hashwa, hapdeng ka Maw U Tieng SC bad ka Ïasnohktilang FC ki la ïasam mar shi point hadien ba la ïakhaid mar shi kol.
Ka Ïasnohktilang ka la pynkhih jar nyngkong eh lyngba ka Jerina Mawlong ha ka minit ba 36, hynrei dei ha ka minit kaba 42 ba ka Maw U Tieng ka la lah ban pynïakhaid kylla lyngba ka Daphishisha Syngkli.
Ka jingïalehkai kaba khatduh jong kane ka lympung kan long ha ka sngi Ba-ar ha kaba ka jingïakhun jong ka Group-A kan long Kick Start Academy pyrshah ïa ka Mawkriah West SC ha ka por 2:30, katba ha ka Group-B kan long hapdeng ka Kharang SC pyrshah ïa ka Synroplang 77 ha ka por 4:15 janmiet.
Na ka liang ki bor pynïaid ka Shillong Sports Association (SSA) ka la rai ban pynkynriah noh ïa ki jingïakhun semi final jong kane ka lympung sha ka 22 tarik (sngi Saitjaiñ) ha madan 1st Ground (SSA Stadium). Kine ki jingïakhun semi final kin long hapdeng ka Laitkor SC pyrshah ïa ka Lumparing SC bad ka Mawlai SC ïa ka PFR Football Academy.
