Basra, Naitung:
Ha kane ka khubor la ong ba kawei ka jaka mane Muslim kaba la don kumba 300 snem mynta bad kaba don hapoh a nongbah Basra jong Iraq, ka la shah pynpra noh naka bynta ban pynheh bad pynïar ia ka surok ha katei ka thaiñ, ha kaba ki la mih ki jingpyrshah na ki kynhun bapher namar ka jingpynpra ia katei ka jaka mane ka long ruh kum ka jingpynrem bad jingleh ibeiñ ia katei ka jaka mane kaba long kum ka dak pynsah kynmaw na ki jingtei kiba la rim bah, ka ban long ruh ka jingai mynsiem ia ki paidbah nongshong shnong trai jong katei ka jaka.
La ong ba ka jing pynpra ia katei ka jaka mane kaba la slem bha la kumba 300 snem, kaba don ha ka thaiñ South jong ka nongbah Basra ha Iraq, ka long tang ban pynheh ia ka surok bah kaba dei iaid lyngba ia katei ka jaka ba don katei ka jaka mane. Hynrei na ka liang jong ki nongialam niam bad kumjuh ruh ki bor pyniaid jong katei ka shnong, ki la pynrem jur halor katei ka jingleh jong ki bor pyniaid ka Iraq, khlem da pyrkhat shuh ia katei ka jingtei kaba ïeng kum ka dak jong ka jaitbynriew ha katei ka jaka.
Ia katei ka jaka mane la tei ha ka 1727, ka jingjrong jongka ka long kumba 11 Metre lane 36 phut bad ia katei ka jaka mane la leit pyntwa da ka kali puh shi-lum ‘bulldozer’ ha ka por shiteng miet jong katei ka Sngi Thohdieng.
Katba, la ong ba ka jingthmu jong u Lat ka Basra, ka long ban tehlakam ia ka jingdheng kali kaba jur ha katei ka nongbah. Hynrei ha kane ka por, ka la wanrah ia ka jingpyrshah na ki bor pyniaid shnong bad ki nongialam niam kiba dei khmih ia katei ka jaka mane bad kiba la shimti ban peit bad pyniaid ia katei ka jaka mane da ki spah snem mynta.
Uwei na ki nongshong shnong ba la rim bha jong ka Basra, u Majed al Husseini, u la ong ba kitei ki heh bad ki bor pyniaid jong kane ka nongbah, kim pyrkhat shuh ia ka burom jong ki paidbah nongshong shnong bad ki leh lyndet ia ka hok bad ka mon jongki watla ki tip ba katei ka jaka mane ka long kawei na ki jingtei kiba pynsah nam bad kaba ïeng ruh naka bynta ki jaitbynriew kiba don ha katei ka nongbah.
U Myntri ka tnat Culture jong ka Basra, u Ahmed al-Badrani haba iakren bad ki lad pathai khubor u la iathuh ba um shym la ai jingbit eiei halor ka jingpynpra ia katei ka jaka mane Muslim ‘Siraji Mosque’ hynrei dei kiwei pat ki bor pyniaid kiba ai jingbit ban leh ia katei ka kam.
Hynrei na ka liang ka tnat Culture, u la ong ba kan ialeh katba lah ban pynneh bad pynsah khamtam ia ki jingtei kiba la neh slem bad kiba ïeng ruh naka bynta ka jait bynriew. La ong ruh ba katei ka jingjia ha kane ka por, ka kumjuh kumba la jia ha u snem 2017 ha kaba ki lehnoh Islamic State (IS) ki la pynbthei bad pynpra ia ka jaka mane Al-Nuri jong ka Mosul.
