Islamabad, Naitung:
Katkum ki khubor la ong ba ka Human Rights Commission of Pakistan (HRCP) ka la maham bad pynbna paidbah ia ka jingma kaba ap ia ki jaitbynriew Hindu hapoh Pakistan hadien ba la bna halor ka jingshah rahbor bad jingshah set ha ki kynhun runar jong ka Pakistan hapoh ka thaiñ Sindh.
Ka HRCP ka la ioh ruh ia ki jing ujor halor ka jingbym biang jong ka jinglong- jingman bad ki kynrum- kynram hapoh ka distrik Kashmore bad ha Ghotki jong ka nongbah Sindh, ha kaba ki don kumba 30 ngut ki jaitbynriew Hindu kiba la shah rahbor bad shah set, kynthup ia ki kynthei bad ki khynnah rit. Ia kane ka kam la leh da ki kynhun runar na katei hi ka nongbah bad katei ka tnat ka dang ialeh katba lah ban bud dien bad thwet ia kitei ki runar bad ban ioh pyllait im noh ruh ia kitei ki 30 ngut kiba la shah rah bad shah kem.
Kane ka la jia hapoh ka distrik Kashmore bad Ghotki jong ka nongbah Sindh, ha kaba ka jinglong- jingman ha katei ka nongbah ka la sniew bad shong syier bha katba nang mih ki sngi.
Shuh shuh ruh la ong ba ka HRCP ka la ioh ki jing ujor halor ka jingshah pynthud jong ki paidbah rit paid ha kitei ki kynhun runar kiba don ha kitei ki thaiñ bad kiba byrngem ruh na ka por- sha ka por ban leit thombor bad pynpra ia ki jaka mane jong ki jaitbynriew ba rit paid.
Kumta, la ong ba dei a tnat kam poh iing jong ka Sindh kaba dei ban khmih bniah bad ban bud dien ruh ia kum kitei ki jingjia kiba ktah ia ka shongsuk- shong saiñ jong ki paidbah nongshong shnong ha katei ka thaiñ bad ban ai ruh ka jingiada khamtam ia ki rit paid kiba shong ba sah hangtei.
Watla katta, la ong ba katkum ka kaiphod ba la ioh lum da ka tnat National Database & Registration Authority (NADRA), la ong ba ki paidbah rit paid ki don tang kumba 5% na ka jingdon jong baroh ki paidbah nongshong shnong ka Pakistan, ha kaba ki jaitbynriew Hindu ki dei kiba bun tam napdeng kiwei pat ki jait bynriew rit paid kiba don hapoh Pakistan.
Ha kine ki khyndiat bnai ba la leit, ki la mih katto katne ki jingjia thombor pyrshah ia ki jaitbynriew Hindu kiba don ha ka shnong Shaikh Bhirkio jong ka Sindh bad kumjuh ruh hapoh ka distrik Tando Allahyar bad kane ka long ka jingma kaba khraw ia ka suk- ka shngaiñ jong ki rit paid khamtam ia ki Hindu hapoh Pakistan.
Kumjuh ruh ki la don ki jingjia thombor ia ki jaka mane Hindu ha ki bynta bapher jong ka Pakistan ha ki por ba la leit.
Ha kawei ka jingjia kaba dang shu dep jia shen lei, ki kynhun runar jong ka Pakistan ki la leit pynjulor ia ka jaka mane jong ki Hindu hapoh ka thaiñ Kashmore jong ka nongbah Sindh da kaba ther ‘namding sha katei ka jaka mane.
Kumjuh ruh ha kawei ka jingjia pat, ha kine ki khyndiat sngi ba la lah, la pynpra noh ia ka jaka mane kaba la 150 snem kaba don hapoh Karachi bad kane ka la jia ha ka miet jong ka Sngi Thohdieng ha ka por bym don lait (electricity) ha katei ka jaka.
Ki paidbah nongshong shnong ki iathuh ruh ba ha katei ka miet, ki pulit ruh ki iadon kti lang ha ka ban ai jingiada ia kito ki nongleit pynpra ha ryngkat ki kali puh shi-lum ‘Buldozers’ hapdeng katei ka jingleh thombor jongki.
Kumta, ha kane ka kynti, ka HRCP ka la dawa ia ka tnat kam poh iing jong ka Sindh ba ka dei ban wad bniah bad ban tohkit bniah, ban shim jingkit khlieh bad ban pynngat kyndon ruh ia baroh kito kbia don kti ha katei ka jingleh ibeiñ jaitbynriew jong kitei ki kynhun.
