Sindh, Naitung:
Ki pulit ka nongbah Sindh, ki la iathuh ba ka jaka mane Hindu kaba don ha ka thaiñ South jong katei ka nongbah, ka la shah thombor da ki ‘namding ha ki kynhun bym don jingithuh ha ka Sngi U Blei.
La ong ba kitei ki kynhun ki la thombor ia katei ka jaka mane kaba rit bad kaba dei jong ki katto katne ki paidbah Hindu kiba shong ha ka thaiñ Kashmore kaba don hapoh ka nongbah Sindh.
Ki pulit ka Kashmore bad Kandhkot ha katei ka sngi ki la leit her mar-mar tang mar ia ioh jingtip hi halor katei ka jingshah thombor jong ka jaka mane ki rit paid Hindu.
La shem ba kitei ki kynhun runar ki la siat da ki ‘namding ‘Rocket Launcher’ sha katei ka jaka mane kaba dang khang bad ka bym don briew ha ka por ba katei ka jingjia ka la jia.
Katei ka jaka mane ka ju plie shi sien shi snem naka bynta ki riew ngeit Hindu kiba ju leit ban mane bad leh niam ha katei ka jaka.
