Shillong, Naitung 18:
Ka Kick Start Football Coaching Centre bad ka Synroplang 77 ki la khur ïa ka jingjop ha kaba kut jong ka lympung ïalehkai Women’s League 2023 ba la pynïaid da ka Shillong Sports Association ha ka sngi Ba-ar ha madan Third Ground, Polo.
Ka Kick Start ka la lah ban pynliem noh ïa ka Mawkriah West SC haduh shiteng dorjon (6-0) ha ka jingïalehkai jong ka Group-A na ka bynta ban khur ïa ka jingjop kaba nyngkong na ki san sien ïakhun.
Watla ka la mad ïa ka jingshah rem haduh saw sien jong kane ka group, pynban ka Kick Start ha kane ka jingïalehkai kaba khatduh ka la lah ban pynpaw ïa ka jingtbit ha kaba kam shym la ailad ïa ka liang pyrshah.
Tang mar ïasdang ka jingïalehkai ka Kick Start ka la ïoh ban pynkhih jar nyngkong eh lyngba ka Eliva Khurkalang ha ka minit kaba 5. Tang hadien katto katne por kane ka kynhun ka la ïoh ban pynbud ïa ka kol kaba ar ha ka minit kaba 19 lyngba ka Shimtilang Thongni bad ïa kawei pat la thep da ka Banteilang Makri ha ka minit kaba 26 na ka bynta ban tam 3-0 kol ha ka kylla step.
Hadien katto katne por ba la bteng biang ïa ka jingïakhun jong ka kylla miet, ka Kick Start ka la ïoh ban thep ar kol lyngba ka Daia Mawkhroh ha ka minit kaba 47 & 49. Ïa ka kol kaba khatduh ka la thep lyngba ka Adaris Kharmalki ha ka minit kaba 60 na ka bynta ban khur syndon ïa ka jingjop.
Haba phai sha ka jingïakhun jong ka Group-B, ka Synroplang ka la pynliem noh ïa ka Kharang SC da 5-0 kol naka bynta ban khur ïa ka jingjop kaba ar ha kane ka lympung.
Watla kine ki kynhun ki la pyrshang ban ïakhun tyngeh naduh kaba sdang, hynrei hadien shiteng kynta ka Synroplang ka la ïoh ban pynkhihjar nyngkong eh lyngba ka Daniela Mylliemngap ha ka minit kaba 31.
Ha ka kylla miet ka Synroplang ka la ïai bteng ha ka ban thep kol lyngba ka Ibannika Kharshiing, kaba la thep ar kol ha ka minit kaba 41 & 53. Ïa kiwei pat ki ar kol la thep da ka Medariiaka Khar-kongor (50) bad ka Piecefully Nongrum (65).
Watla ki ‘thei ïalehkai ka Kharang ki la pyrshang ban pynphai, hynrei kim shym la lah ban pynurlong bad ha kaba klut ka la mad ïa ka jingshah rem kaba san ha kane ka lympung.
Lyngba kane ka jingjop kaba ar, ka Synroplang ka la kamai 6 point, katba ka Ïasnohktilang ka la kamai 4 point.
Ha kaba ïadei bad ka jingïakhun semi final jong kane ka lympung kan long ha ka sngi Saitjiañ ha SSA Stadium, Polo. Ka Laitkor SC kaba la wan ha ka kyrdan ba hakhlieh jong ka Group-A kan ïakynduh pyrshah ïa ka kynhun kaba wan ba-ar ha ka Group-B, ka Lumparing SC ha ka por 2 baje, katba ka Mawlai kaba la wan ha ka kyrdan ba hakhlieh jong ka Group-B kan iakynduh pyrshah ia ka kynhun kaba wan ba-ar ha ka Group-A, ka PFR Academy ha ka por 4 baje janmiet. Ïa ki tiket lah ban ïoh na katei ka jaka.
Ki kynhun ki ban khur ïa ka jingjop kin ioh rung sha ka final, ka ban long ha ka 29 tarik mynta u bnai ha ka por 4 baje janmiet ha First Ground.
