Geneva, Naitung:
Ka World Health Organization (WHO) ha ka Lah Sngi U Blei, ka la pyntip ba ha ka sien ba nyngkong bun tylli na ki miaw ba la ioh ban peit bniah hapoh Poland, baroh ki dei kiba la shah ktah ha ka jingpang ‘Bird Flu’.
Ka WHO ka iathuh ruh ba tang mar ia ioh jingtip na ka tnat ka koit ka khiah jong ka Poland ba ha u bnai ba la lah, ka jingiap jong ki miaw hapoh ka ri ka la jur bha bad hadien ba la dep ban peit bniah bad ban leh ia ki test bapher, 29 tylli miaw ki la ioh kem ia u khñiang jingpang H5N1 jong ka jingpang ‘Bird Flu’.
Napdeng ki 46 tylli ki miaw ba la ioh ban peit bniah, kitei ki 29 tylli ki dei kiba la ioh kem bad shah ktah ha utei u khñiang jingpang, ha kaba kitei ki 14 tylli ki dei kiba la kem pang bad 11 tylli pat kiba la iap syndon.
Ia ka jingiap khlam ba khatduh jong ki miaw ha Poland, la shem ha ka 30 tarik u Jylliew.
Hynrei, ki stad saïan kim pat lah ban sngewthuh ha kano ka rukom ba kitei ki miaw kin ioh kem ia utei u khñiang jingpang ba ju shem ha ki jait sim kum ki syiar bad ki sim. Kumta ki tnat ba dei pule bniah ki dang pyrshang ban wad bniah halor ka daw jong ka jingioh kem ki miaw ia katei ka jingpang ba ju shem ha ki sim.
Naduh u snem 2021 hi, la ong ba ka Europe ka la sakhi ia ka jingjur ka jingpang Bird Flu, katba ka North bad South America pat ki kham shah ktah duna ban ia katei ka bynta.
Ka jingjur jong ka khlam Bird Flu ka la ktah ruh ia ki phew million ki syiar ha kylleng ka pyrthei bad utei u khñiang jingpang H5N1 u la sdang mih pyrthei nyngkong eh ha u snem 1996.
Kumta, ka WHO ka dang wad bniah ruh ioh lehse ka jingiakynduh jong ki briew bad kitei ki miaw kiba la ioh kem ia katei ka jingpang, ka lah ban pur ruh wat sha ki briew. Hynrei katkum ka kaiphod ba la ioh lum na ka jingpule bniah kaba la pyndep ha ka 2 tarik u Naitung, la shem ba katei ka jingiakynduh hapdeng ki briew bad kitei ki miaw kiba ioh pang, kam shym don jingma eiei ruh bad katei ka jingpang kam shym lah ban pur sha ki briew. Namarkata ruh la ong ba kam da don jingma eh ia kito kiba ri miaw ha iing watla kim lah ban kiar na ki jingri jongki namar katkum ka jingpule ba la pyndep ha ki taiew ba la leit, la shem ba katei ka jingpang kam lah ban pur sha u briew.
Namar kumba la ju tip hi ba ka jingpang Bird Flu kam lah ban pur sha u briew bad kam don jingma ruh ia u briew na katei ka jingpang hynrei dei tang ia ki jingri hi ba u briew u hap ban duh nong lada ki jingri jong u kin ioh kem ia katei ka jingpang.
