Jowai, Naitung 18:
U Treilang Kyndait u la khyrwit ïa ka hat-trick bad pynlong ïa ka Myrjai ban khur ïa ka jingjop ha ka lympung ïalehkai 3rd Division Football Tournament na ka bynta ka 3rd Adelbert Laloo Memorial Trophy.
Ïa kane ka lympung la pynïaid da ka West Jaiñtia District Sports Association (WJDSA) ha madan Kiang Nangbah Stadium Ladthadlaboh ha ka sngi Ba-ar.
Ka nam jop jong ka Myrjai ka la wan hadien ba ka la lah ban pynliem noh ïa ka Salaroh da 5-0 kol.
Kumba ka paw ki rangïalehkai ka Myrjai ki lah ban ïalehkai bha naduh kaba sdang ha kaba u Lamphrang Kyndait u la ïoh ban pynkhih jar ha ka minit kaba 15 bad ïa ka kol kaba ar la thep da u Jumonki Phawa ha ka minit kaba 23.
Ka Myrjai ka la ïai bteng ban ïakhun ha kaba ka la ïoh ban thep kol biang lyngba u Treilang Kyndait, uba la khur ïa ka hat-trick hadien ba u la ïoh ban thep ha ka minit kaba 26, 65 & 69 na ka bynta ban khur syndon ïa ka jingjop.
Ha kawei pat ka jingïakhun ka Mookaswan Dongnein bad Chyrmang Wah ki la ïasam mar shi point hadien ba ki la ïakhaid mar 1-1 kol.
Ka Chyrmang Wah ka la pynkhihjar nyngkong eh lyngba u Arkiru Bang haka minit kaba 42, hynrei ka Mookaswan Dongnein ka la lah ban pynphai kylla lyngba u Tei Lyngdoh ha ka minit kaba 65 na ka bynta ban ïakhaid mar shi kol.
Ka Lumbhahdakha ka la pynliem ïa ka Catholic Youth Mihmyntdu da 3-1 kol. U Daeimitre Suchiang u la thep ar kol ha ka minit kaba 42 & 46 bad ïa kawei pat la pynbud da u Gideon Mukhim ha ka minit kaba 52. Katba ka Catholic Youth ka la lah ban pynphai kylla shi kol lyngba u Arki Tariang ha ka minit kaba 54 hashwa ba kan mad ïa ka jingshah rem.
Ha ka jingïakhun kaba khatduh, ka Nangbah Pohshnong ka la pynliem ïa ka SCSC Nonglatem da 2-1.
Ha kane ka jingïakhun ka SCSC Nonglatem ka la ïoh ban pynkhih jar nyngkong eh lyngba u Tomi Lamare ha ka minit kaba 19. Hadien katto katne por ka Nangbah Pohshnong ka la lah ban pynphai kylla lyngba u Bah Rang Lyngdoh ha ka minit kaba 41 bad ïa kawei pat la thep da u Riyo Dhar ha ka minit kaba 46.
