Warsaw, Naitung:
Ha ka Sngi Nyngkong, la ong ba kawei ka liengsuiñ ka la leit hap bakla ha kawei ka jaka madan ba thylli hapoh Hangar hajan Warsaw, ha kaba 5 ngut ki la duh noh la ka jingim ha katei ka jingjia.
U Myntri ka tnat ka koit ka khiah jong ka Poland, u Adam Niedzielski u la pyntip ba ha katei ka jingjia, ki don 7 ngut kiba mynsaw bad 5 ngut pat kiba la khlad noh.
U Niedzielski u iathuh ruh ba 4 tylli ki liengsuiñ ‘helicopter’ bad 10 tylli ki kali kit nongpang ki la leit ban poi sha katei ka jaka mar-mar tang mar ia ioh jingtip halor katei ka jingjia hapoh ka shnong Chrcynno, kumba 47 kilometre lane 29 mile na Warsaw.
La pyntip ruh ba dei ka tnat pynlip ding jong katei ka thaiñ ka la leit poi nyngkong eh ha katei ka jaka tang mar ia ioh jingtip halor ka jingleit hap bakla jong katei ka liengsuiñ bad ki birew jong katei ka kynhun ki la pyllait ruh ia ki dur jong katei ka jingjia ha kaba la ioh ia ka tdong jong katei ka liengsuiñ kaba la kdiang bad kheiñ lakajong.
Ki lad pathai khubor ka Poland ki iathuh ruh ba katei ka liengsuiñ kaba hap ka dei ka liengsuiñ Cessna 208.
Shuh shuh ruh la ong ba ki don katto katne ki briew ha katei ka thaiñ ba leit hap katei ka liengsuiñ, katba ki dang leit ban rieh tngen shipor namar ka jingsniew ka suiñ bneng ha katei ka sngi. Kumta la ngeit ruh ba dei namar ka jingsniew jong ka suiñ bneng kaba pynlong ia katei ka liengsuiñ kam lah shuh ban tehlakam.
