Shillong Naitung 18:
Ka jinglong jingman ka la nang itriem haba ïadei bad ka jingpyndonkam ïa u drok, ha kaba ki la don ki bym salia shuh ban dung ïa u thyrnia injek drok ha ki jaka paidbah ha Shillong.
La ïathuh ba ki don ki jaka paidbah ha kaba ki briew kiba pyndonkam ïa u drok, kim salia shuh wat lada ïohi ki paidbah,l ïa ki, hynrei ki dang salia tang lada don ki pulit hajan.
Ki don katto katne ki jaka paidbah kum ha thaiñ Polo, ha kaba ki pulit ki la ïoh ruh ban bat bun phew ngut kiba pyndonkam ïa u drok bad kumjuh ruh ki nongdie.
“Ngim shngaiñ shuh haba peit ïa ka jinglong jingman ha ka imlang sahlang. Kito kiba la kyrni ha ki jingdih basniew khamtam lei lei u drok, ngi ishyrkhei ban peit namar kim salia mynta ban injek drok ïalade wat ha ki jaka paidbah,” la pynpaw ki paidbah kiba ïaid lynti ha thaiñ Polo.
Ki la ong ba ki pulit ki dei ban peitngor bha bad leh da kaba tyngeh namar ki don kiba ym salia shuh parabriew ban pyni paidbah ïa ki kam bym long kiba ki leh.
Ka nongai ktien ka Sorkar MDA-II, ka Kong Ampareen Lyngdoh ka la ong ba jingjyllei ki jingsniew ka wanrah ka jingbym shngaiñ ïa ki nongshong shnong.
Ka la ong ba donkam ban peitngor bad tehlakam ïa ki kam sniew kiba la nang ïai jia ha kane ka nongbah Shillong.
Haba kren shaphang ka jingshah rah ki kynthei kiba la suba ba ki dei kiba ïaid awria, ka Kong Ampareen ka la ong ba ban peitngor ka long kaba donkam hynrei donkam ruh ban pynshisha bad pyntikna bha namarba ym ba man ka kynthei kaba ïeng surok ka dei kaba ïaid awria.
Kane ka Myntri ka la kyntu ruh ïa ki paidbah ban long kiba husiar bad katba lah, dei ban don ka jinglong ryntih nalade, khlem da donkam ban ap ïa ka jingwan pahara ki pulit, hynrei shim ka jingkitkhlieh halade.
Haba kylli shaphang ka jingjia ha Thanat Laitumkhrah bad ka jingkawang ïa ka ïing jong ka dang shen, ka Kong Ampareen ka la ong ba donkam ban wad bniah kaei kaba jia ha kato ka sngi, bad kumno ka bakla, bad ym lah ban ngeit ba kano kano kynhun seng kan hikai ïa la ki dkhot ban leh ïa kaba sniew.
“Ki pulit ki hap ban kham peitmat bad shim ka rai kaba skhem ban ïakhun ia ki jingsniew,” ka la ong.
Shuh shuh kane ka Myntri Sorkar ka la ong ba donkam ruh ban tehlakam ïa ka jingpyndonkam ïa ka Social Media bad pyndonkam da ki kyndon aiñ pyrshah ïa kiba tam palat pud.
Ka la ong ba ki don shibun ki aiñ kiba dei ban pyndonkam ban ïada na kano kano ka jinglong jingman kaba lah ban lam sha kano kano ka bynta kaba pyni kumba ym don aiñ.
“Ngi donkam ban peitngor bad ki pulit ki leh ïa kaba dei kum ki nongpahara bad donkam ban kyrpad ïa ki paidbah ruh ban tehlakam ïalade khlem da donkam ïa ki briew ka aiñ ban pynbeit lem,” ka la ong.
