Shillong, Naitung 18:
Ka PFR Football Aca-demy kaba long kawei na ki shlem ai jinghikai ïa ki khynnah ha ka jingïaleh-kai phutbol, ka la shah khot ban ïashim bynta ha ka Under-15 Gold Cup National Football Cham-pionship ka ban long naduh 21 tarik mynta u bnai ha West Bengal.
Haba ïakren bad u President jong ka shlem ai jinghikai, u Bah Franky Kharumnuid u la ong ba kum ka shlem ai jinghikai ka dap da ka jingkmen kaba khraw hadien ba la ïoh ïa ka jingithuh wat da ki nongpynïaid kiba na shabar ka jylla lyngba ka jingshah khot ban ïashim bynta ha katei ka lympung jong ka National Level kaba long kawei na ki rynsan kaba ki khynnah jong kane ka shlem kin ïoh ïa ka lad ban pyni ïa ki sap ki phong jong ki ha ka National Level bad kumjuh kaba long ruh ka jingai mynsiem ïa ki khynnah haba ki ïoh ïa ka lad ban ïalehkai ïa ki lympung ïalehkai shabar jylla namar dei ha kum kine ki lympung kiba heh kiba ki khynnah kin sngewthuh kumno ba kin nanglah ban trei shitom ban pynjanai ïalade na ka bynta ban pynlong ïa kane ka jingïalehkai kaba ki ïeid kum ka lad jingkamai jong ki ha ki khyndiat snem ki ban sa wan.
Ia kane ka Team yn ialam da u Tyngshainlang Kharlyngdoh kum u Head Coach bad u Franky Kharumnuid kum u Team Manager.
Kane ka kynhun kan mih na kane ka nongbah ha ka 20 tarik mynta u bnai bad na ka liang ki bor pynïaid kane ka shlem ai jinghikai ka la ai ka jingkitbok kitrwiang ïa kane ka kynhun bad kyrmen ba kin ïoh kheit ïa u soh jong ka jingjop ha kane ka lympung.
