Agartala, Naitung:
Ka sorkar Tripura ka la pynbna ïa ki jingthmu na ka bynta ban leit mih sha ka ïingbishar ba ha khliehduh jong ka ri, ka Supreme Court ha ryngkat ka Special Leave Petition (SLP) ban lah ban pynduh noh shi syndon ïa ki jingeh kiba mih lyngba ka jingthung kam ïa ki nonghikai Graduate, la ong u Myntri Rangbah jong ka jylla u Dr Manik Saha hapoh Assembly.
U Myntri Rangbah u la kren ïa kine ki kyntien kum shi bynta ban ai jubab halor ka shithi ba la phah da u nongïalam ka liang pyrshah u Animesh Debbarma.
Ïa ka Selection Test for Graduate Teachers (STGT) Examination la pynlong da ka Teachers Recruitment Board Tripura (TRBT), ha kaba la mih ki jingeh, ka jingpyntreikam halor kane ka jingthungkam kam pat dep wat hadien 9 bnai.
Kine ki jingsahteng ha kaba ïadei bad ki rukom pyntreikam ka la buh jingeh shibun.
Ka High Court jong ka Tripura ka la kyntait ïa ka jingkyrpad jong ka sorkar jylla ban phah khmih bniah halor ka jingbishar jong ka kynhun uwei nongbishar kaba la ong ba la don palat 50 percent ki Post ïa kiba ym shym la mang katkum ki kynhun ba la dei ban buh na ka bynta kawei ka jingpynbna ha kaba ïadei bad ka jinglait kam.
