Nongstoiñ, Naitung 19:
Ar ngut ki runar ki la shah rai pynrem ha ka ïingbishar u Special Judge (POCSO), Nongstoin, mynha ka 18 tarik u Naitung 2023 da kaba phah set along haduh 10 snem ha ryngkat ka jingshah daiñ kuna ba kin hap siew kaba T.30 hajar.
Ka kyrwoh khubor bala phah la ong ba kitei ki ar ngut ki runar kiba shah rai pynrem la tip kyrteng kum u Shaiborlang Nongsiej bad u Judonlang Kharbani bad ka jingshah rai pynrem ka long hadien ba ka ïingbishar kala lap ïa ki jingshisha halor ka jingdonkti ka jong ki ban leh be-ijot ïa kawei ka khynnah kaba dang 17 snem ka rta.
Ka khubor ka ong ruh ba katei ka jingjia ka dei kaba la jia ha ka 20 tarik u Ïaïong jong u snem 2021 ha kaba kiba haïing jong katei ka khynnah kila ujor ïa katei ka jingjia hapoh ka thanad Nongstoin bad la register ïa ka case katkum ka Case No:22(4)2021u/s 3(a)/4 POCSO Act.
La ong ruh ba hadien ba la lap ïa ki sabut kiba biang halor ka jingdonkti jong kitei ki ar ngut ban thombor ïa ka khynnah ba dang 17 snem, na ka liang ka ïingbishar u Special Judge POCSO kala lah ban ai ka jingbishar kaba hok da kaba hukum ban pynsaja ïa kitei ki runar da kaba phah set along haduh 10 snem da kaba pynngat ruh ha ki kyndon aiñ jong kaba 4(1) jong ka POCSO Act.
