Bertina Lyngdoh
Ka poitri ka wan ha ki jingiohi ki dur ba paw. Ha ki poitri, lane lyngba ki poitri, u myllung u ju thoh bad pynpaw ïa ki jingshem ne ki jingïohi bad ka jingïaid lynti jong u. Ka thoh ka tar poitri ka dei kawei ka rynsan ban nang pynïar la ka jingstad, ka buit ka sap. Nalor ka buit ka sap ba ki don, ki don ruh ïa ki jingsngewtynnad ba kyrpang jong ki ban yn wandur ïa kata ka jingsngewtynnad jong ki ha ka thoh poitri. Kaba kongsan pat haba ïadei bad ka poitri, ka long ba ka poitri ka wan ruh haka bor pyrkhat u myllung lyng-ba ka jingmutdur, la ka jingsngew, jingmad, jingïohi, jingsma, jingïohsngew kiba dei ki bynta jong ka met u briew. Ka poitri ka dei ka litirashor ha kaba bun na ki nongthoh ki jied bad ba ki kylla long u Myllung.
Dei haka poitri, ba u Myllung u ïoh ban pynpaw ïa ki bun ki jingsngew ne ki jingïohi kumjuh ruh ban pashat jingmut sha ka pyrthei mariang. Hangne, u Myllung u pynpaw kum ïa ka jingsngewieid, jingisih, jingngeit, jingïap, ka jing-itynnad ka mariang lem bad ki jingthaw baim jong ka, ka jingjynjar, jingban beiñ, ki jingsngewbha pyrthei bad kiwei kiwei.Lyngba ka poitri, u Myllung u ai ruh ïa ki jinghikai ruh ka kyntu ka kynpham bad buh ki symboh pyrkhat jong ki ha ki nongpule. Ka kyntu ka sneng ne ka kraw ryngkat kang ki pynshai haka thoh poitri jong ki. Haki poitri, bunsien ki ju pynknmaw ïa u paidbah ban ieid la ka ktien ka thylliej, ka pynneh ka pynsah ka riti dustur, bad khamtam ban ieid bad burom la ka ri bad ka jaitbynriew.Da ka jingthoh ïa ki poitri, ka pynlong ïa u nongthoh ban khraw haka pyrkhat pyrdaiñ ba jabieng te kan ym mynthi. Wat la ka poitri ka lah ban long kaba bad lyngkot, hynrei ka don la ka bor jong ka ban ktik uba pule. Ka buit ka sap bad ka stadpyrkhat poitri ïa kiba bun ki Myllung kata la ka long ha kano kano ka ktien, ka pynlong ïa ki nongpule ki ba bun ban bat bad buh jingkynmaw ïa ki laiñ ne ki dkhot kiba sngewtynnad bad bashongdor bha ha ki. Kiba bun na ki nong-thoh poitri, ki ju pynïadei ïa ki jingthaw baim ka ma-riang kum ki sim ki doh, ki mrad mreng, ki lum ki wah, ki phlang jyrngam, ki saw aïong, bad ka jingim briew. Ki poitri ki lah ruh ban long, kum ka jingthoh ne ka jingrwai kyrpang ïa uno uno u briew ne kaei kaei ka ban pynsakynmajunoshyrta. Na ki poitri, lah ruh ban pynkylla sha ka sur rwai, ki artikle, ki jingïathuhkhana, ha kaba ka lah shisha ban pynroi bad kyntiew ïa ka thoh ka tar. Na ki poitri ngi nang bad tip ruh ïa ki kyntien kiba kit jingmut, kiba la jah noh bad kiba ngim pat ju tip ne sngew. Kane ka long ka jingmyntoi ïa uba bun u nongpule poitri.
Kumta, ka poitri ka im, ka hikai, ka pynkynmaw bad ka neh haki jingthoh jong ka. Ka nam ka kyrteng bad ka burom ruh ksah ha ka poitri ha ki jingthoh jong ka ne kata ka stad pyrkhat kaba ngam jylliew ha ki mynsiem dohnud briew. Ka jingnoh synñiang kiba bun haka thoh ka tar ka long ka atiar kaba pynim ïa ka ri, ka ktien lem ruh ka jaitbynriew. Namar kata, to ngin nang pynïar la ka stad pyrkhatpoitri ne kata kaba haka ktien nongwei ngi ju ong, “the philosophy of poetry”.
