Islamabad, Naitung:
Katkum ki khubor la iathuh ba 2 ngut ki khynnah rit khlad noh bad 3 ngut pat ki la mynsaw jur hadien ba ki la ioh ban dih ia ka jingdih ‘Milk Shake’ kaba la shah khleh bih hapoh Sahiwal jong ka Punjab Province ha Pakistan ha ka Sngi Ba-ar.
Katkum ki jingtip ba la ioh lum, la shem ba uwei u briew na Sahiwal u la ai dih ia katei ka jingdih ha ki 5 ngut ki khun jong u, bad hadien ba ki dih ia ka, baroh 5 ngut ki la ioh kem pang kynsan, ha kaba 2 ngut kim lah shuh ban kyrda bad ki la khlad noh tang hadien khyndiat kynta ba ki la ioh dih ia katei ka jingdih.
Kitei ki 2 ngut kiba la khlad noh, ki kynthup ia i khyllung ba dang 7 bnai ba la tip kyrteng i ‘Anas’ bad iwei pat ba dang 3 snem ka rta ia iba la ju khot da i ‘Haram’.
Katba, kitei ki 3 ngut pat kiba dang lait im, ki kynthup ia ka Abeeha 13 snem ka rta, ka Faiqa 11 snem bad u Emaan 6 snem ka rta bad kiba dang shah pynthiah hapoh jaka sumar katba ka bih kaba don ha ka met jongki kam pat khuid lut.
