New Delhi, Naitung:
Katkum ki khubor la ong ba uwei u khyllung 3 snem ha California, u la kum bakla siat ia ka para ba dang 1 snem da ka suloi rit bad kane ka la jia ha ka Sngi Nyngkong hapoh ka nongbah California jong ka United States.
Katei ka jingjia ka la jia ha ka thaiñ Fallbrook jong ka San Diego County. Ki pulit ki la ioh jingtip ha ka Sngi Nyngkong ba uwei u khyllung u la siat bakla ia katei ka khyllung kaba long ka para jong u bad ynda ki leit poi ha katei ka iing, ki shem ia utei u khyllung ha ryngkat ka suloi kaba don ha ka kti jong u hadien ba u la dep siat ia katei ka para kaba dang 1 snem tam.
La ong ba ka daw jong kane ka jingjia ka long namar ba kiba don ha iing kim shym buh bha ia katei ka suloi rit bad kumta utei u khyllung haba u iohi ia katei ka suloi u la shim bad siat kumba ju long ki suloi kai bad khlem da poi pyrkhat pat ba katei ka jingsiat jong u kan shim syndon ia ka jingim jong ka hynmen jong u ha katei ka sngi.
Ki pulit ki shem ba katei ka khyllung ka don ia ka dak mong kuli ha ka khlieh jongka bad ki briew jong ka kynhun iarap ki la leit pynkit noh ia ka sha ka hospital kaba don ha Palomar, ha kaba ki bor pyniaid jong katei ka hospital ha ka por kumba 8:30 ki la pynbna ba katei ka khynnah kam don shuh.
