Seoul, Naitung:
Ka tnat iada jong ka South Korea, ha ka Sngi Balang ka la pynbna ba ka North Korea ka la pynher ‘namding biang bad ha kane ka por utei u ‘namding jongka North Korea u la leit hap sha ki bynta ka duriaw jong ka Japan.
Katei ka jingpynher ‘namding jong ka North Korea ha kane ka por ka long ruh hadien ki jingpynkhreh jong ka South Korea bad ka United States ban wad ia ki lad jingiada ban lait na ki jingshah ktah ha katei ka jingleh be-aiñ jong ka North Korea na ka por- sha ka por
Kumjuh ruh ka tnat shipai jong ka South Korea ka dang wad bniah ban tip ia uba kum u ei u jait ‘namding ba ka North Korea ka pynher ha kane ka por.
Namar la ong ruh ba katei ka jingpynher ‘namding jong ka North Korea ka long hadien katto katne sngi ba u nongialam katei ka ri u la pynbna ia ka jingpyrshang pynher jong ka North Korea ia ki ‘namding ‘Intercontinental Ballistic Missile’ (Hwasong-18).
Haba iadei bad kane, la ong ba ka jingiadei hapdeng jong kitei ki ar tylli ki ri Korea (kata; ka South Korea bad ka North Korea), ka la poi shaduh u pud ban ia pynkut noh syndon ia ka jingiatrei lang namar ki jingïakynad kiba ju jia na ka por- sha ka por, khamtam haba iadei bad ka jingpynher ‘namding ba khah-khah jong ka North Korea kaba la wanrah jingma ia ka shongsuk- shong shngaiñ jong ka South Korea bad ki ri ba marjan jongka.
Kum shi bynta ban iada ia ka jinglong jingman jong ka South Korea, ka United States bad ka South Korea ha kine ki sngi, ki la pynjur ia ka jingiatrei lang ban pynkilan bad ban pyntbit ia ki shipai jongki ha ryngkat ka jingpyndonkam ia ki liengsuiñ thma bapher, khnang ban ioh tehlakam ia ka jingleh don bor jong ka North Korea lada ka North Korea kan leit ban thombor ia ka South Korea ha kano- kano ka por bym lah tip.
