Shillong, Naitung 19:
U MLA ka Voice of the People Party (VPP) na North-Shillong konstitwensi, Bah Adelbert Nongrum u la pynpaw ka jingsngewhun hadien ba ka Meghalaya Public Service Commission (MPSC) ka la pynmih biang ïa ka jingpynbna haba ïadei bad ka kam Meghalaya Civil Service (MCS) ka ban long nangne shakhmat ha ka liang ka ‘Roster System’.
“Kum u nongmih-khmat kam mut tang ba ngin kynthoh ïa ki jingduna – hynrei ngi ai jingmut ban pynbha, bad ngi hap ai jingïaroh ruh haba dei,” ong u Bah Nong-rum ha ka kyrwoh khubor.
Haba kdew ba ka MPSC ka la pynmih biang ïa ka jingpynbna halor ki kam ba lait na bynta ka MCS (35 tylli) da kaba pynlong nangne shakhmat ïa ka ‘Roster’, u la ong ba ka tnad ka la pyndam noh ïa ka jingpynbna ka barim, ha kaba la lap ïa ka jingnoh shiliang ha ka bhah thung kam – kata 14 tylli ki kam ba lait na bynta ki paid Garo bad tang 11 tylli na bynta u paid Khasi-Jaiñtia.
“Ha kato ka por nga la kren hakhmat ki lad pathai khubor bad buh jingkylli ïa ka jingbakla ka ‘Roster System’ da kaba pyni nuksa. Kumta haba nga ïohi ïa ka jingpynbna bathymmai ka MPSC ha kaba ïa ka bhah thung kam la mang mar katjuh, kata mar 14 tylli ki kam ba lait hapdeng ki Khasi-Jaiñtia bad ki Garo, nga dap da ka jingkmen bad ka jingsngewhun,” ong utei u nongmihkhmat.
Ha kajuh ka por, u la pynpaw ka jingkyrmen ba ka jingpynmih biang ïa ka jingpynbna halor ki kam ba lait da ka MPSC ka long tang ka jingsdang ban pynbeit ïa ka ‘Roster System’ ha ki tnad treikam Sorkar bapher-bapher.
“Nangne shakhmat nga kyrmen ba ka MPSC kan pynmih biang ïa ka jingpynbna bathymmai haba ïadei bad ki kam LDA – Secretariat, Veterinary Officer bad Junior Divisional Accountant bad kumta ter-ter,” ong u Bah Nongrum.
Shuh shuh u don ka jingkyrmen ba ka Central Recruitment Board jong ka tnad pulit ka Jylla kan pynmih biang ïa ka jingpynbna na bynta ki kam ‘Constable’ (ba lait) khnang ba ki khun samla ka Jylla kin ym duh ïa la ka hok la ki dei na kano-kano ka kynhun jaidbynriew.
