Imphal, Naitung:
Kum shi bynta ban ïaleh pyrshah ïa ka Curfew, da ki hajar ngut ki longkmie ki la pynlong da ka jingïakhih kaba heh ha san tylli ki distrik jong ka Manipur ha ka sngi Balang. Kane ka jingïakhih ka long ban dawa ba dei ban pynshitom da kaba tyngeh pyrshah ïa ki lehnoh Kuki bad ban wanrah biang ïa ka shongsuk-shongsaiñ ha ka jylla kham kloi katba lah.
Ka sorkar Manipur ha ka sngi Balang kam shym la pynjlan ïa ka Curfew kumba ju pynlong ha kine ki san tylli ki distrik ha kaba ka la pyntreikam kham bun ki shipai ïada na ka jingdon jong ka jingïakhih ki longkmie, ïa kaba la pynïaid da ka Kwairamband Ima Keithel Joint Coordinating Committee for Peace (KIKJCCP).
Ka KIKJCCP ka la buh da ka jingkyrpad sha baroh ki longkmie ba kin pynlong da ka jingïakhih ba la tip kum ka ‘Mothers’ Protest’ na ka bynta ban dawa ha ka ban pynïoh biang ïa ka jingsuk ha ka jyllla.
Hashwa ban pynlong ïa kane ka jingïalang na ka bynta ban pynpaw ka jingpyrshah jur halor ki jingïakynad ba la mih ha ka jylla, ka la don ka jingkyrpad ïa ki longkmie jong ki thaiñ bad ki distrik ba kin ïashim bynta ha ka jingïakhih.
