UK, Naitung:
Uwei u briew na United Kingdom uba la order ia ka computer ‘Laptop’ ba 500 pound na ka Amazon, u la ioh pdiang pynban ia shibun tylli ki synduk jingbam.
Ia utei u briew la ithuh kyrteng kum u Adam Yearsley, bad u la thied ia ka laptop ‘HP ProBook’ kaba shong dor bha, hynrei ha katei ka sngi haba u la ioh pdiang ia katei ka tiar ba la wan pynpoi ha ka kti jong u, kaba sngew lyngngoh ka long pynban ba u shem pynban da ki synduk jingbam kum ki biskit, shana bad kiwei- kiwei. Kumta utei u rangbah 40 snem, u ngeit ba baroh ka long tang ka kam thok jong katei ka kompeni bad u long uwei napdeng kito kiba sniew bok bad thaw leit ngat ha katei ka kam thok jong ka kompeni Amazon.
Ha katei ka sngi, u Yearsley u la maham ia ki paidbah baroh lyngba jong ka rynsan Social Media ‘Twitter’ ba ki paidbah ki dei ban husiar bha ia ka jingleh thok jong katei ka kompeni namar haba u thied ia katei ka laptop, ynda la pynpoi ia ka bad haba u la plied, u shem pynban ia 36 tylli ki song jingbam hapoh jong ka synduk heh ba la pynpoi sha u.
Haba iadei bad kane, na ka liang jong katei ka kompeni Amazon, ka la pan map ia utei u briew bad ka la kular ruh ban pynphai noh syndon ia baroh ka pisa katkum ba u la dep siew naka bynta katei ka order jong u.
Utei u briew u la iathuh ba ha ka por ba u ioh pdiang nyngkong ia katei ka synduk, u shem ba ka sting bha, hynrei u pyrkhat ba ki tiar ba ju pynmih ha kine ki sngi ki long kiba sting hynrei kiba bha, kumta u la shim beit ia katei ka synduk shapoh iing bad u la plied ia ka, ha kaba u shem pynban da ki jingbam kiba la thep pyndap ha katei ka synduk.
