Washington, Naitung:
Ka United States ha ka Sngi Balang, ka la pynbna biang sa ia ka $1.3 Bilion ka song jingiarap na ka bynta ka tnat shipai jong ka Ukraine. Kane ka long khnang ba ka tnat iada jong ka Ukraine kan lah ban pynbit pynbiang ha ka liang ka tnat liengsuiñ, ki tup-ki man, ki drone bad kiwei kiwei de ki liang.
Katei ka song jingiarap na US sha ka Ukraine ha kane ka kynti ka long ban ai jingkyrshan ia ka Ukraine ba kan lah ban pynkhlaiñ shuh shuh ia ka tnat shipai thma jongka hapdeng ka jingiakhun pyrshah ia ka Russia ha katei ka thma.
Hynrei la ong ba katei ka song jingiarap kan kham shem poi ban leit poi sha madan thma, namar ba ka hap hapoh jong ka Ukraine Security Assistance. Kaba mut ba ka US ruh ka thied ia kitei ki tiar thma na ka tnat iada lane na ki paralok jongka.
Katei ka song jingiarap ka ban phah ha kane ka por, kan kynthup ia 4 tylli ki tiar iakhun NASAMs bad kumjuh ruh ki tiar ban pyndait hangta, ki ‘namding TOW, ki kuli 152 mm, ki drone bad kiwei kiwei de ki kali iakhun thma.
Ka United States ka la ialeh katba lah ban ai ka jingkyrshan ba ratbah ia ka Ukraine naduh ba sdang ka jingleit hiar thma jong ka Russia bad ka la ialeh ruh katba lah ban phah ia ki lad jingiarap naduh ki tiar thma bapher- bapher kum shi bynta ban ai bor ia ka Ukraine khnang ba kan lah ban iada ia la u jong u pud- u sam bad ba kan lah ruh ban ioh knieh biang ia baroh ki bynta kiba dei hok ki jongka bad kiba la shah kurup bad shah kam trai noh ha ka Russia.
