Shillong, Naitung 21:
Ka Director ka tnat ïalehkai jong ka Sorkar Jylla, ka Kong Isawanda Laloo ka la pynpaw ba ka jingbym mih bha u phlang ha Jawaharlal Nehru Stadium, Polo ka la pynlong ïa ka jylla ban duh noh ïa ka lad ban pynlong ïa ka 132nd Durand Cup ha kane ka nongbah.
Ïa kane ka lympung ïalehkai kaba la rim bha hapoh ka ri la thmu ban pynlong ha ki saw tylli ki jaka. Ka Shillong ka la long kawei na kita ban ïoh pynlong ïa ki katto katne ki jingïalehkai, hynrei ka daw ka jingbym lah ban pyndep ïa ka JN Stadium ka la pynlong ban duh noh ïa kane ka kabu ksiar ha ka sien kaba nyngkong eh.
Haba ïakren bad ki lad pathai khubor ha ka Sngi Thohdieng, ka Kong Isawanda ka la pynpaw ba kaba kongsan eh ka dei ka madan ïalehkai namar u phlang um shym la lah ban mih ha ka por kaba biang. Ka la ïathuh ba la thung ïa utei u phang naduh u Ïaïong 2023, hynrei namar ka jingrang tyrkhong bad ka jingjur u slap ha u Jymmang, utei u phlang um shym la lah ban mih bha kumba la khmih lynti.
“Hadien ka jingleit jurip bad ka jingïamir jingmut lang bad ki heh ophisar jong ka kynhun shipai jong ka ri la hap ban pynsangeh noh ïa katei ka jingthmu. Ngi sngewthuh ïa kane ka jingeh namar ka madan ïalehkai ka dei ban long kaba biang khnang ban pynlong ïa ki rangïalehkai ba kin lait na ki jingmynsaw.”
“Kumba phi ïatip ka Durand Cup ka dei ka lympung ban ïaknieh rung sha ka Asian Federation Cup (AFC) ha kaba ki don haduh 12 tylli ki kynhun ïalehkai jong ka Indian Super League ki ban ïashim bynta nalor ki klob I-League. Te kumta ki madan ïalehkai ki dei ban long kiba biang bad ki ban ïaryngkat bad ki stadium ki ri ka pyrthei,” la pynpaw u Major General Mohit Mohendroo MG ASC ka Eastern Command.
Ka Kong Laloo ka la ong ba kum ka tnat kan ïaleh katba lah ban pynlong ïa katei ka stadium kaba biang pura nadong shadong khnang ba ha u snem ban wan yn lah ban pynlong ïa ka Durand Cup. “Nga pynthikna ba ngin trei shitom mynta u snem ban pyndep noh ïa ka jingmaramot ïa ka JN Stadium khnang ban pynlong ïa katei ka lympung ha u snem ban wan.
Ha kaba ïadei bad ka jingbym lah ban pynlong ïa ka Durand Cup ha kane ka nongbah mynta u snem, u Mohit Mohendroo u la ïathuh ba hadien ka jingleit jurip lang ïa katei ka stadium la lap ba kam shym la long kaba biang namar ba dang maramot ïa ka. “Ka madan kam pat shym la long kaba biang na ka daw ka jingjur slap bad u phlang um shym la mih bha. Te lada pynïalehkai ha kum katei madan kan wanrah ka jingmynsaw ïa ki rangïalehkai.”
Na ka liang ka Sorkar Jylla ka la khmih lynti ban pyndep noh ïa ka jingmaramot ïa katei ka stadium khnang ban lah pynlong ïa katei ka lympung ha u snem 2024.
Ka Durand Cup ka dei ka lympung kaba la rim bha ha Asia kaba pynïaid da ka kynhun shipai jong ka Indian Army. Ka jingthmu jong kane ka lympung ka long ban noh synñiang ha ka ban kyntiew ïa ka jingïalehkai phutbol hapoh ka ri.
“Mynta u snem ngin pynlong ha Kolkata, Guwahati bad ha Kokrajhar kaba ha Assam ha kaba ki don haduh 24 tylli ki kynhun hadien ba la pynrung biang sa ar tylli kiwei pat kiba kynthup ïa ar tylli ki kynhun shipai kiba nabar ri kata na Nepal bad Bangladesh,” la bynrap u Mohendroo da kaba ïathuh ba ka Shillong Lajong kan ïashim bynta ha kane ka lympung.
