Washington, Naitung:
Ka White House ha ka Sngi Balang ka la maham ba ka Russia ka lah ban ther ‘namding bad thombor ia ki jaka buh mar bam jong ka Ukraine, kynthup ia ka jhad ‘riew paidbah kaba don ha Black Sea.
U Lamphang jong ka National Security Council jong ka White House, u Adam Hodge, u la ong ba ki heh ka United States ki ioh jingtip ba ka Russia ka la phah ia ki jhad ‘namding hajan jong kitei ki jaka ba don ka jhad jong ki riew paidbah ka Ukraine ha katei ka duriaw.
Kumta, ruh ki la maham lypa ba ka Russia ka lah ban leh eiei lada kam lah shuh ban iakhun pyrshah ia ka Ukriane na kitei ki bynta ba ka la sdang ban tur naduh ba sdang.
U Hodge u la ong ruh ba ka Russia ka la deo pynbna teng ba baroh ki jhad jong ka Ukraine kiba don ha ka duriaw Black Sea kin dei beit ki jhad thma bad kim lah ban long ki jhad jong ki riew paidbah. Namar kata ruh la ong ba ka Russia ka la pyn-ap lypa da ki ‘namding ban ther sha kitei ki jhad kiba don sha katei ka bynta lada kumno- kumno ka ipher bad ka kwah ban thombor.
Ha ka Sngi Balang, ka Ukraine ruh ka la kynnoh ba ka Russia ka la pynjot bad pyn julor lut ia ki jaka ba kynshew mar bam ha Hellish hapdeng ka jingther ‘namding ba khlem sangeh jong ka Russia ha ka kylla step jong ka Sngi Balang bad katei ka jingther ‘namding jong ka Russia ka long sha ki ar tylli ki bynta jong ka jaka ba ïeng ki jhad ka Ukraine ha Black Sea.
