Johannesburg, Naitung:
Ki bor pyniaid ka Johannesburg ha ka step Sngi Palei ki la lap ia kawei ka metïap na ka phang pdeng jong ka nongbah Johannesburg hadien ka jingbthei ka bym don jingtip ha katei ka surok ha ka janmiet ba la leit.
La shem ba katei ka jingbthei ka la ksam thliew syndon ia ka bynta jong katei ka surok bad katei ka surok ruh ka la orpait lut.
Ki bor pyniaid jong ka Johannesburg ki iathuh ba ha katei ka jingjia, ki don kumba 48 ngut ki riew paidbah kiba la ngat bad mynsaw.
La shem ruh ba ka tdem kaba mih na katei ka jingbthei ka long kaba pher bad ka dei ka tdem kynja bih, ha kaba ki kali bad ki bos rit ruh ki da khyllem bad kylla syndon ha katei ka jingbthei kaba la jia ha katei ka janmiet.
watla katta, ym pat shym la lah ban tip ia ka daw jong katei ka jingbthei kaba jur wat haduh kane ka kynti bad ki tnat wad bniah ki dang bud dien ban lap ia ka daw jong katei ka jingbthei ha katei ka jaka.
Katkum ka jingshem na ki camera CCTV ba la pyndait ha katei ka jaka, ym shym la iohi eiei ban don kiba leit buh bom ne leh eiei hashwa jong katei ka jingbthei. Hynrei tang mar ia jia katei ka jingbthei, la iohi ia ki paidbah kiba la shu mareh ruma tang ban pyllait im ialade bad kumta ruh ki pulit ki la khang noh ia katei ka surok naduh katei ka miet hi.
Ki tnat wad bniah ki suba ba lah ban dei ka jingbthei jong ki pipe tyndong lyer ‘pipe gas’ ba pyniaid napoh ka khyndew. Katba na ka liang jong ki kompeni kiba dei khmih ha katei ka bynta pat, ki la kyntait ia kata namar la ong ba ki paidbah nongthied bad kiba pyndonkam ia katei ka lyer kim shym ud ba don jingthut eiei bad baroh kiei- kiei ki iaid beit- iaid ryntih kumba ju long.
