Shillong, Naitung 21:
U rangïalehkai barim ka Shillong Lajong FC, u Samuel James Lyngdoh Kynshi u la pynïasoh sha ka Punjab FC kaba dei kawei na ki klob ba ïashim bynta ha ka Indian Super League ryngkat bad ar ngut ki rangïalehkai kiba kynthup ïa u Kingslee Fernandes bad u Nitesh Darjee na ka bynta ka aïom ïalehkai 2023-24.
U Samuel uba dang 23 snem ka rta, u la pynïasoh sha katei ka klob hadien ba u la ïoh ban ïalehkai ha ka I-League na ka Real Kashmir FC. Na kane ka klob u la ïoh ban thep 6 kol bad ban long kum u rangthep kol ba ïoh bun eh ha ka aïom ba la dep.
U Kingslee Fernandes u la pynïasoh sha kane ka klob hadien ba pynlut ïa ka por ïalehkai haduh lai tylli ki aïom na ka Churchill Brothers. Une u rangïalehkai shapdeng ba dang 25 snem ka rta, u la lah ban pynurlong ïa ka FC Goa ban rah ïa ka ISL League Shield ha ka aïom 2019-20 hashwa ba un ïalehkai noh na ka FC Goa (reserves) ban rah ïa ka Goa Professional League.
Haba phai sha u Nitesh Darjee, u la pynïasoh sha ka Punjab FC hadien ba u la lah ban pynpaw ïa ka jingtbit ha ka Reliance Foundation Development League ha kaba ka Sudeva Delhi FC ka la wan ha ka kyrdan ba-ar ha ka National Championship.
Halor kane ka jingïoh ban soi thymmai ïa kitei ki rangïalehkai, u Technical Director ka Punjab FC, u Nikolaos Topoliatis u la ong, “Ngi sngewkmen eh ban pdiang ïa kitei ki rangïalehkai kiba don ïa ki sap ïalehkai sha kane ka klob. Te kumta ngi khmih lynti ba kin lah ban ïalehkai bha na ka bynta ka Punjab FC ha ka aïom ka ban wan.”
