Mykolaiv, Naitung:
Ki bor pyniaid ka Ukraine ki la iathuh ba 3 ngut ki briew ki la khlad noh bad ka jaka ba dei khmih ia ki kot ki sla jong ki nong China ha Ukraine ruh ka la julor na ka jingther ‘namding ka Russia sha Ukraine ha ka miet Sngi Palei.
U Lat katei ka thaiñ u la pyllait paidbah ia ki dur kiba la pyni ia ka jing julor jong katei ka shlem treikam ba dei khmih ia ki nong China ha ki bynta jong ka Odesa ha ka nongbah ba hajan ka Black Sea.
Haba iadei bad kane, na ka liang jong ka China pat kam shym la kren eiei wat haba la ïohsngew ia ka khubor halor ka jing julor jong katei ka jaka ba dei khmih ia ki paidbah nong China kiba don ha Ukraine. U President ka Ukraine- u Volodymyr Zelensky u la iathuh ruh ba kumba 60,000 ton ki mar rep ba la mang naka bynta ka China, ki la julor lut ha katei ka jingther ‘namding jong ka Russia ha katei ka miet.
Kumjuh ruh ka Russia ka la pynbna ba ka la pynphai kylliang bad ther ‘namding biang sha Ukraine hadien ba ka la kynnoh ba ka Ukraine ka la ther ‘namding bad pynjulor ia ka jingkieng kaba ka Russia ka ju pyndonkam naka bynta ka khaii- pateng.
Ka tnat iada jong ka Ukraine ka la pyntip ba ka Russia ka la ther haduh 19 tylli ki ‘namding bad ka la phah ruh kumba 19 tylli eiei ki drone ha katei ka miet, ha kaba ka Ukraine ka la ioh ban siat pynbthei noh ia 5 tylli ki ‘namding bad 13 tylli ki drone kiba leit poi sha Ukraine.
Ha ka Sngi Thohdieng, u Zelensky u la ong ba ki lehnoh jong ka Russia ki pyrshang katba lah ban pynkhyllem jubor ia ka Ukraine bad ki ialeh katba lah ban pyn-julor bad pyn-um syndon ia ka Ukraine.
Kumjuh ruh ha Odesa, la ong ba uwei u nong-ap pahara jong katei ka jaka u la duh noh la ka jingim ha ryngkat bad 8 ngut kiwei pat kiba la mynsaw, kynthup ia iwei i khynnah rit kiba iadon ha katei ka jaka ha ka por ba ka Russia ka ther ‘namding sha katei ka bynta.
