Seoul, Naitung:
Ka North Korea ha kane ka sien, ka la maham tyngeh ia ka United States halor ka jingphah ia ki liengsuiñ bad ki jhad thma sha ki bynta shajan ka duriaw jong ka bad ka la ong ba lada ka US kan dang iai bteng ia kane, ka North Korea kam banse ban pynphai kylliang da ki kam nuclear hi namar ka jingleh jong ka US ha kane ka por ka la wanrah jingma ia ka shongsuk- shongshngaiñ jong ka North Korea.
Katei ka jing byrngem jong ka North Korea ha kane ka por, ka long ruh hadien ka jingiatrei lang jong ka South Korea bad ka United States haba iadei bad ka jing pyntbit ia ki tnat shipai bad kumjuh ruh ban maham pyrshah ia ka North Korea halor ki kam pynher ‘namding jongka na ka por- sha ka por.
U Myntri ka tnat iada jong ka North Korea, u la kynnoh ruh ia ka United States bad South Korea ba ki ialeh ban wanrah jingma ia ka North Korea da kaba thmu ban pyndonkam da ki tiar nuclear bad ban pyntieng ia ka North Korea ha kane ka por.
La iathuh ruh ba ha ka Sngi Palei, uwei u shipai ka US u la leit ban kam sha shiliang u pud jong ka North Korea wat hapdeng ki jingïakynad bad jingiathud hapdeng ka North Korea kaba ïeng pyrshah ia ka US bad ka South Korea.
Hynrei ka North Korea kam shym la pynpaw ne kren eiei shaphang jong utei u shipai ka US bad kam kwah ban pynpaw dak shun eiei haba iadei bad kane.
