Nairobi, Naitung:
Katkum ka kaiphod ba la ioh lum hadien ka jingwad bniah bad jingtih jylliew halor ka jingdon jong ki riewngeit na Kenya kiba la shah ialam bakla ha ki katto katne ki nongialam niam da kaba hikai ia ki ban shah thngan khnang ba kin ioh ban kynduh ia u Jisu Khrist. Ha kane ka por la shem ba ki don palat 400 ngut kiba la shah ialam bakla bad kiba kynthup ha katei ka kynhun jong ki riewngeit kiba pynshitom ialade. Kitei ki 400 tam ki kynthup ruh ia 12 tylli ki metïap ba dang shu lap ha ka Sngi Nyngkong, ha kaba ki don shibun ngut ruh kiba la ioh ban pyllait im noh da ki bor pyniaid ha ki por ba la leit.
Ka jingdon kiba khlad hapdeng ka jingshah thngan jong kitei ki riew ngeit kiba la shah ialam bakla ka la kiew sha ka 403 ngut.
La ong ruh ba katba ki bor pyniaid ki dang wad bniah ia katei ka khlaw kaba don ha Kenya, ki dang lap shuh shuh ruh ia ki metïap jong kito kiba la khlad noh hapdeng ka jingleh niam bad jingshah thngan jongki ha katei ka jaka bad ia kitei kiba khlad la tep noh ha katei hi ka khlaw. Ia katei ka kam, la lap ha ka 13 tarik u Iaiong bad ki bor pyniaid ki la kem noh ia kitei ki nongialam bad ha kajuh ka por ruh la ioh pyllait im noh ia kitei ki riew ngeit kiba la tlot bha ha katei ka por ba la shem ia ki na katei ka khlaw.
Hadien ba la peit bniah bad pyndep ia ka post-mortem jong kitei kiba khlad, la shem ba ka daw jong ka jingkhlad jong baroh kitei kiba la shah tep ha katei ka jaka, ka dei beit tang namar ka daw jong ka jingshah thngan bad ka met jongki kam don bor shuh haduh ba kin da khie tlot bad iap hajuh.
Ia utei u nongialam katei ka jait rukom ngeit, la ioh kem noh da ki pulit ha katei ka jingleit khynra ha u Iaiong bad la ong ba utei u nongialam jong kitei ki riew ngeit ba shah ialam bakla, u dei u nongñiah kali kamai, hynrei hadien pat u kylla long pynban sha u nongialam niam bad u la ioh ban khring ia shibun bah ki briew kiba la ngop bad sngap ia ka rukom ai jinghikai jong u.
Ha ka 3 tarik u Naitung, ka ïingbishar na Mombasa ka la pynjlan shuh ia ka por tohkit ia utei u nongialam namar ka jingbym biang jong ki jingphla jong u.
Don ruh kiba la pharep bad iathuh ba utei u briew u dei uba la don dak teng ha ki kam thombor jong ki lehnoh.
Utei u briew uba la kam ialade ba u long u Pastor, u la wanrah ia katei ka niam Good News International Church ha u snem 2003.
