Shillong, Naitung 23:
Kum shi bynta ban pynshlur ïa ki khun samla ban ïa shim bynta ha ka jingïalehkai Arm wrestling, ka Bouncer Association of Meghalaya ryngkat ka jingïatreilang bad ka Meghalaya Aids Control Society bad ka Shillong College, ka la pynlong ïa ka lympung ïakop ïakhun kti kaba shisngi kaba la tip kum ka Inter College Arm Wrestling Championship 2023, kaba la long ha ka 22 tarik u Naitung 2023 ha Shillong College.
Ha kane ka lympung ïakop ïakhun kti la wan ïa shim bynta na ki College bapher bapher na Ribhoi District, West Jaintia Hills District bad East Khasi Hills District. La wan ïa shim bynta 100 ngut ki samla khynthei bad 230 ngut ki samla shynrang.
Ha kane ka lympung kaba shisngi, u Shemladbha Khongwir na ka Seng Khasi College u la ïoh rah ïa ka nam ‘champion of champion’ ha ka liang ki shynrang katba ka Yirmi Jagoi na Women’s College ka la ïoh rah ïa ka nam lahduh ha ka liang ki kynthei.
Kiba jop ha kane ka jingïakop ïakhun kti ki long, ha ka 50 kilo shapoh (kynthei) ba nyngkong ka Pynsuklang Lyngdoh (Seng Khasi College), ba-ar ka Da-I-Hunshisha Mawlong (Seng Khasi College) bad ba-lai ka Alberis Sten (Women’s College). Ha ka jingïakop 55 kilo shapoh (kynthei) ba nyngkong ka Parkles T. Lyngkhei (NEHU), ba-ar ka Daphinia Kurkalang (St. Mary’s College) bad ba-lai ka Jasmine Synrem (St. Mary’s College).
Ha ka 60 kilo shapoh (kynthei) ba nyngkong la rah da ka Riteeka Sarki (BBS College), ba-ar la ïoh da ka Bahunshisha Marwein (Seng Khasi College) bad ba-lai ka Dakarabha Dkhar (Shillong College). Ha ka 60 kilo shaneng (kynthei) ba nyngkong ka Yirmi Jagoi (Women’s College), ba-ar ka Durka Padit (Shillong College) bad ba-lai ka Phidalin Mary Pathaw (St. Mary’s College).
Ha ka 55 kilo shapoh (shynrang), ba nyngkong la ïoh da u Shemladbha Khongwir (Seng Khasi College), ba-ar u Benison Marwein (Government Boys’ Higher Secondary School) bad ba-lai u Shanbhalang Rynjah (St. Anthony’s College). Ha ka 65 kilo shapoh (shynrang) ba nyngkong la ïoh da u Imonmi Suchiang (Synod College), ba-ar u Reilly M Kharsyntiew (Shillong College) bad ba-lai u Damewanri Kharjana (Synod College).
Ha ka 75 kilo shapoh (shynrang) ba nyngkong la ïoh da u Andy L. Mylliem Umlong (Institute of Software Technology), ba-ar da u Tolammame Mylliempdah (Shillong College) bad ba-lai da u Bamang Tajik (St. Dominic College, Nongthymmai). Ha ka 75 kilo shaneng (shynrang) ba nyngkong la ïoh da u Heiwamut Laloo (Kiangnongbah College, Jowai), ba-ar da u Saka Korelhei (KL Bajoria College) bad ba-lai da u Dasienmiki Niangti (Shillong College).
U Shemladbha Khongwir j ong ka Seng Khasi College u la khur ïa ka nam Champion of Champion bad ha ka liang ki kynthei pat ka Yirmi Jagoi na Women’s College ka la khur ïa ka nam Champion of Champions, katba ka khusnam ba kyrpang na ka bynta ka Best Athlete la khur da u Maianbok Marwein (St. Anthony’s College).
Ha kane ka sngi la wan sakhi lang da u Bah A Mawthoh, District Sport Officer jong ka East Khasi Hills District, u Bah JF Kharshiing, President MSOA, Bah Fantin J Lakadong, MDC ka Malki Laitumkhrah, ka Dr. E Kharkongor, Principal Shillong College, ka Kong Larina Nongpiur na Meghalaya Aids Control Society bad kiwei kiwei.
