Shillong, Naitung 23:
U coach ka Mawlai Sports Club u Bah Khlaiñ Pyrkhat Syiemlieh u la shimti noh kum u coach ba thymmai jong ka Langsning Football Club naduh ka aiom ïalehkai 2023-24 bad u Bah Sailon Syngkrem kum u Asst. Coach, la pynbna ïa kane da ka klob ha ka sngi Saitjaiñ.
Une u coach u dei uba la lah ban pynurlong ïa ka Mawlai Sports Club ban khur ïa ka nam lahduh ha ka Shillong Premier League jong ka aiom ba la dep.
Ka jingthmu jong Langsning FC ka long ban pynkhlaiñ ïa ka kynhun khnang ba kan lah ban pynurlong na ka bynta ban rah ïa ka nam lahduh ha ka Shillong Premier League bad ruh ban ïoh ïa ka lad ban ïashim bynta ha ka Second Division jong ka I-League ha ka aiom ka ban wan.
“Ha ka jingshisha kane ka klob kam dei shuh kaba dang thymmai na ka bynta jong nga namar ha ki por kiba mynshwa nga la ïalehkai teng na ka Langsning bad nga la don bynta lang kum uwei na ki coach ïa kane ka kynhun ha u snem 2005 hapoh ka jingïalam jong u L Darlong kum u nongïalam ka kynhun,” la pynpaw u Bah Khlaiñ Pyrkhat haba ïakren bad ki lad pathai khubor.
Watla baroh ki klob ki la pyndep ïa ka jingsoi ïa ki rangïalehkai, hynrei utei u coach um shym la lah ban wanrah lang ïa ki rangïalehkai kiba kynsai ki ban mihkhmat ïa kane ka kynhun. “Kane ka long kaba eh bha ïa nga mynta ka kynti namar ngam shym la ïoh ban wanrah lang ïa ki rangïalehkai ban pynkhlaiñ ïa ka kynhun, hynrei ngan pyrshang ban pynwandur ïa kane ka kynhun khnang ba kan kynjoh sha ka thong namar ka klob ka dang ailad ïa nga ban wanrah ïa ki rangïalehkai kiba nabar jylla.”
Watla ka Langsning ka dei ka klob kaba la bit la biang, hynrei u Bah Khlaiñ Pyrkhat u la pynpaw ba un ym lah ban jam beit sha ka kyrdan kaba heh, hynrei kaba nyngkong eh ka long ban jop shwa ïa ka Premier League bad ïa kaba sah yn sa peit hadien.
Ha kawei pat ka liang u Secretary jong kane ka klob u Bah Fredy Kharpran u la pynpaw ka jingsngwkmen ban wanrah ïa u Bah Khlaiñ Pyrkhat ba un shimti kum u coach uba thymmai ryngkat u Bah Sailon Syngkrem kum u Asst Coach hadien ba ka klob ka la pynkut noh ïa ka kontrak bad u coach barim u Bah Hering Shangpliang.
“Ka jingsoi ïa u Bah Khlaiñ Pyrkhat kam mut tang ha ka SPL, hynrei ka jingangnud ka long ban leit ïashim bynta ha ka Second Division League bad kane ka dei ka rai na ka ïing ka sem jong ka klob. Te lyngba ka jingshimti u Bah Khlaiñ, ngi ngeit ba ngin lah ban pynurlong na ka bynta ban rung sha ka I-League,” la bynrap u Bah Fredy.
