Islamabad, Naitung:
Ki bor pyniaid ka Pakistan ha kane ka por ki sngewkhia halor ka jingkit ram jong ka Pakistan tang namar ban ioh khie-khlieh biang na ka jinghiar ka ioh-ka kot jong katei ka ri ha ki por ba la leit. Hynrei hashwa ban poi ka ilekshon ban sa wan, la ong ba ka Pakistan ka donkam shuh shuh ia ka jingiarap lyngba ka ‘International Monetary Fund (IMF)’ ban ioh jingkyrshan bad ban shim ram na kiwei pat ki nongai ram.
Kumta la ong ruh ba ka Pakistan ha kine ki sngi, ka don hapdeng ka jingma kaba khraw lada kam lah shuh pat ban siew biang ia ka ram ba ka la shim bad ka long ruh ka jingma kaba kham khraw shuh shuh lada ka Pakistan kam lah ban khie-khlieh bian wat hadien ba ka la bah da ka ram-ka shah ban khyllie biang ia ka ioh ka kot jong ka ri ha kiba bun ki liang.
