Guwahati, Naitung:
Ka kynhun lehnoh kaba la shah ñiew beaiñ, ka United Liberation Front of Asom-Independent ha ka Sngi U Blei ka la pynmih da ka khubor byrngem pyrshah ïa u Assam Director General of Police, u GP Singh ha kaba ïadei bad ki kam ba dang shen ba la leh da ki pulit ha ka jylla. Ïa ka jingbyrngem la phah sha u heh pulit lyngba ka jingthoh na ki lad phah khubor ba la pynmih lyngba ka Mail ha ka Sngi U Blei da u nongïalam jong ka kynhun ULFA-I, u Rumel Asom.
Kane ka long ka jubab ha kaba ïadei bad ka jingjia jong ka jingsiat ki pulit ha kaba la don uwei u dkhot ka seng uba la mynsaw ha Upper Assam. Ka kynhun ULFA-I ka la pynshisha halor shibun kiei kiei ha kaba ka la ong ba ki la don ki riewpaidbah kiba la lum pisa ha ka kyrteng jong ka seng. Ka kynhun ka la kyntait ruh ba ka la ïatreilang bad ka briew kaba dei na ka jait Gogoi na Tinsukia, ïa kaba la shahkem dang shen ha ki pulit jong ka Dibrugarh halor ka jingshah kynnoh ba ka la lum pisa beaiñ ha ka kyrteng jong ka seng.
