Istanbul, Naitung:
Katkum ki khubor la ong ba u Myntri Rangbahduh ka Israel, u Benjamin Netanyahu un sa leit sha Turkey ha kane ka taiew bad ka lah ban long kumba la pynbeit ba katei ka jingleit jurip jong u kan dei ha ka 28 tarik u Naitung ban iakynduh markhmat bad u President ka Turkey- u Recep Tayyip Erdogan.
La ong ba u Erdogan un pdiang sngewbha ia u President ka Palestine- u Mahmoud Abbas bad kumjuh ruh ia u Myntri Rangbahduh ka Israel- u Benjamin Netanyahu ha kitei ki sngi ka jingleit jurip jong ki sha Turkey watla kam long ha kajuh ka sngi, hynrei ka jingleit jurip jong kitei ki nong-ialam kan long ha kajuh ka taiew.
La ong ba kitei ki leit ban iakren ban pynskhem ia ka jingiadei hapdeng ka Israel bad Turkey bad kumjuh ruh na ka liang ka Palestine pat kan leit ban pynskhem ia ka jing-iadei hapdeng ka Palestine bad ka Turkey, wat hapdeng ki jingïakynad jong kitei ki arliang ri (ka Israel bad ka Palestine) kumba la ju iohi man ka por.
Ha u Iaiong, la ong ba ka la mih ka jingïakynad ha ka jaka mane Al-Aqsa ‘Mosque’ kaba don hapoh ka nongbah Jerusalem, ha kaba k pulit ka Israel ki la iakhun pyrshah ia ki paidbah nong Palestine hapoh jong katei ka jaka ba kyntang.
Kumjuh ruh u Erdogan u la ong ba ka Israel ha ka jingshisha, ka la leh palat pud bad ka la leh ia kaba bakla haba iadei bad katei ka jingjia.
Hynrei hadien katto katne snem jong ka jingïakynad hapdeng kitei ki arliang ri, ka jingiadei hapdeng ka Turkey bad ka Israel pat ka la nang kham janai, ha kaba ki heh jong kitei ki arliang ri ruh ki ju leit ban jurip markylliang ban pyniaid shakhmat ia ki kam ki jam ba kitei ki ar ri ki ju iatrei lang na ka por- sha ka por.
Ka jingiadei hapdeng ka Turkey bad Israel ka la sdang tlor ha u snem 2010, hadien ba ki shipai ka Israel ki ther bom ia ka jhad Mavi Marmara jong ka Turkey, katba katei ka jhad ka dang thmu ban leit kit ia ki jingiarap sha Gaza Strip, kaba long ka thaiñ khappud jong ka Palestine bad Israel naduh ba la synshar da ka kynhun Islamic Hamas.
Hynrei katba nang iaid ki por, ka Turkey ka la sdang ban map ia ki jingbakla jong ka Israel bad ka jingiadei hapdeng jong kitei ki arliang ri ka la nang jan bad nang skhem haduh kine ki sngi ba mynta.
