Mexico, Naitung:
Kumba la ju tip hi ba ki nongkhaïi drok ki ju ialeh katba lah ban buhrieh ia u drok la ka long ha ki jingbam- jingdih lane ha kino- kino ruh ki rukom tang ban ioh ban pynpoi ia u sha ki nongthied. Kumta ruh ha kane ka por la ong ba ki bor pyniaid ka Mexico ki la ioh kurup kumba 18 pound u drok Cocaine ba la thep bha hapoh ki song ‘cheese’ hapoh ka plastik. ïa kane ka lap da ki heh pulit kiba ap pahara ha ka jaka sangeh jhad ha Presidio ha ka 20 tarik u Naitung.
La ong ba ia utei u drok la lap na kawei ka trok kaba leit ban rung sha Mexico hadien ba ka kynhun talasi kaba ju leh ia ka ‘X-ray Scan’ ha katei ka jaka, ka la iohi ia ka jingai dang jong ki tiar peit bniah ba don eiei hapoh jong katei ka trok ha ka por ba ka iaid lyngba na katei ka jaka, ha kaba ki la bat bad pynsangeh ia katei ka trok kaba kit ia katei ka jingbam ‘cheese’ bad lap pynban haduh kumba 17.8 pound utei u drok uba la tynsat lang ha ryngkat bad kitei ki jingbam.
Ki heh ka Mexico ki la rah noh ia katei ka trok bad ia ki drok ba la ioh ban kurup baroh. La kem ruh ia u nongñiah jong katei ka trok uba dang 22 snem ka rta bad la aiti noh ia u ha ka kti jingtohkit jong ka tnat Homeland Security Investigations na ka bynta ki jingtohkit kiba bniah haba iadei bad katei ka kam shalan drok be-aiñ.
Ha kawei pat ka jingjia, la ong ba ki bor pyniaid ka Italy ki la ioh kurup haduh 5.3 ton u Cocaine ba la pynkit da ki jhad kiba la wan poi na ka phang Shathie jong ka nongbah Sicily ha ka Sngi Thohdieng. Utei u drok ba la ioh kurup baroh un shong dor kumba 850 Million Euros lane $946 Million, ha kaba ki la ioh bat noh ruh ia 5 ngut ki briew kiba don kti ha ka jing pynpoi bad shalan ia utei u droks.
Haba iadei bad kane ka jingjia, la ong ba ki pulit ki la bud dien bad peit thuh bha ia kawei ka jhad kaba wan poi na ki bynta South ka America ha ka step phyrngab jong ka 19 tarik u Naitung hadien ba ka liengsuiñ syntiat ka iohi ia ki song ba la pynhap na katei ka jhad shapoh um ha ki bynta jong ka Strait of Sicily bad kiba la pynkhreh ban leit tong bad tan noh pat da ki nongtong doh kiba don ha katei ka bynta jong ka rud duriaw.
